'തീവണ്ടി' സിനിമയുടെ നിര്‍മ്മാതാവിനെതിരെ കേസ്

തിരുവനന്തപുരം: പുകയില നിരോധിത നിയമം ലംഘിച്ചതിന് തീവണ്ടി എന്ന സിനിമയുടെ നിര്‍മാതാവിന്‍റെ പേരില്‍ ആരോഗ്യവകുപ്പ് കേസെടുത്തു. സിഗററ്റിന്‍റെ മാതൃകയിലുള്ള അക്ഷരങ്ങള്‍ പതിച്ച ഫ്‌ളക്‌സ് ബോര്‍ഡ് തിരുവനന്തപുരം ജില്ലയിലെ കല്ലമ്പലത്തിനടുത്ത് ആഴാംകോണത്ത് കണ്ടെത്തിയിരുന്നു. ഇത്തരത്തില്‍ പുകയില ഉല്‍പ്പന്നങ്ങളുടെ പരസ്യം നല്‍കുന്നത് രണ്ടു വര്‍ഷം വരെ തടവുശിക്ഷ ലഭിക്കാവുന്ന കുറ്റമാണെന്ന് ജില്ലാ മെഡിക്കല്‍ ഓഫീസിന്‍റെ അറിയിപ്പില്‍ പറയുന്നു.

ആഗസ്റ്റ്‌ സിനിമാസ് നിര്‍മ്മിച്ച ചിത്രം സംവിധാനം ചെയ്തിരിക്കുന്നത് നവാഗതനായ ഫെലിനിയാണ്. ഒരു ചെയിന്‍ സ്‌മോക്കറുടെ കഥയാണ് ചിത്രം പറയുന്നത്. വിനി വിശ്വലാലാണ് തീവണ്ടിയ്ക്കു വേണ്ടി തിരക്കഥയൊരുക്കിയത്.

തൊഴില്‍രഹിതനായ ബിനീഷ് എന്ന കഥാപാത്രത്തെയാണ് ടൊവിനോ അവതരിപ്പിക്കുന്നത്. പുതുമുഖ നടി സംയുക്ത മേനോനാണ് ചിത്രത്തില്‍ ടൊവിനോയുടെ നായികയായി എത്തുന്നത്. സൈജു കുറുപ്പ്,സുരാജ് വെഞ്ഞാറമൂട്,സുധീഷ്,സുരഭി ലക്ഷ്മി തുടങ്ങിയവരാണ് ചിത്രത്തിലെ മറ്റു കഥാപാത്രങ്ങളെ അവതരിപ്പിച്ചിരിക്കുന്നത്.