കുഞ്ചാക്കോ ബോബനെതിരെ വധശ്രമം; യുവാവ് പിടിയിൽ

കൊച്ചി: നടൻ കുഞ്ചാക്കോ ബോബനെതിരെ റയിൽവേ സ്റ്റേഷനിൽ വച്ച് വധശ്രമം നടത്തിയയാള്‍ പിടിയിൽ. ഒക്ടോബര്‍ അഞ്ചിന് രാത്രി എറണാകുളം സൗത്ത് റെയില്‍വേ സ്റ്റേഷനിൽ വച്ചാണ് സംഭവം നടന്നത്. നടൻ ഷൂട്ടിംഗിന് വേണ്ടി കണ്ണൂരിലേക്ക് പോകുന്നതിനുവേണ്ടിയാണ് റെയില്‍വേ സ്റ്റേഷനിലെത്തിച്ചേര്‍ന്നത്. ട്രെയിനിൽ കയറാൻ നില്‍ക്കുന്നതിനിടെ ഒരു യുവാവ് അടുത്തെത്തി അസഭ്യവര്‍ഷം നടത്തുകയായിരുന്നു. ശേഷം കൈയില്‍ സൂക്ഷിച്ച വടിവാളുമായി നടനെ കൊല്ലുമെന്ന ഭീഷണിയായി.

ബഹളം കേട്ട് മറ്റ് യാത്രക്കാര്‍ എത്തിയാണ് ഇയാളെ പിടിച്ചുമാറ്റിയത്. ഇതോടെ പ്രതി ഓടി രക്ഷപ്പെട്ടു. കണ്ണൂരിലെത്തിയ കുഞ്ചാക്കോ ബോബന്‍ വിവരം പാലക്കാട് റെയില്‍വേ പൊലീസ് ഡിവിഷനില്‍ അറിയിച്ചു. കണ്ണൂരിലെത്തിയ നടന്‍ താമസിച്ചിരുന്ന ഹോട്ടലിലെത്തി കണ്ണൂർ റെയില്‍വേ എസ്‌ഐ മൊഴിയെടുത്ത് വധശ്രമത്തിന് കേസെടുക്കുകയായിരുന്നു.

റയിൽവേ സ്റ്റേഷനിലെ സിസിടിവി ദൃശ്യങ്ങള്‍ പരിശോധിച്ചതോടെ പ്രതിയെ തിരിച്ചറിയാനാകുകയായിരുന്നു. ഞായറാഴ്ച വൈകീട്ടോടെയാണ് ഇയാളെ കസ്റ്റഡിയിലെടുത്തിരിക്കുന്നത്. ഇയാളെ നാളെ കോടതിയിൽ ഹാജരാക്കും.