വിസ്മയിപ്പിക്കുന്ന പ്രകടനവുമായി ധ്രുവ് വിക്രം; 'ആദിത്യ വർമ്മ' ട്രെയിലർ

തമിഴ് സൂപ്പർ താരം ചിയാൻ വിക്രത്തിന്‍റെ മകൻ ധ്രുവ് വിക്രം നായകനായി അരങ്ങേറ്റം കുറിക്കുന്ന 'ആദിത്യ വര്‍മ്മ' എന്ന സിനിമയുടെ ട്രെയിലര്‍ പുറത്തിറങ്ങി. വിജയ് ദേവരകൊണ്ട നായകനായി തെലുങ്കിൽ സൂപ്പര്‍ ഹിറ്റായ അര്‍ജുന്‍ റെഡ്ഡിയുടെ തമിഴ് പതിപ്പായാണ് ആദിത്യ വര്‍മ്മ ഒരുങ്ങുന്നത്.

'അര്‍ജുന്‍ റെഡ്ഡി'യുടെ സഹസംവിധായകനായിരുന്ന ഗിരീസായ ആണ് ചിത്രം സംവിധാനം ചെയ്തിരിക്കുന്നത്. മുമ്പ് 'വര്‍മ്മ' എന്ന പേരില്‍ ഇതേ ചിത്രം സംവിധാനം ചെയ്ത ബാലയെ നിര്‍മ്മാതാക്കള്‍ മാറ്റിയതോടെയാണ് ഗിരീസായ സംവിധായകനായി മാറിയത്. ഇ4 എന്റര്‍ടെയ്ന്‍മെന്‍റ്സാണ് നിര്‍മ്മാതാക്കള്‍.

ആദിത്യ വര്‍മ്മയിലെ നായികയായെത്തുന്നത് ബനിത സന്ധുവാണ്. ഒക്ടോബര്‍ എന്ന ബോളിവുഡ് ചിത്രത്തിലൂടെ ശ്രദ്ധേയയായ നടിയാണ് ബനിത. തെന്നിന്ത്യന്‍ നടി പ്രിയ ആനന്ദും സിനിമയിൽ അഭിനയിക്കുന്നുണ്ട്. യൂട്യൂബിൽ മികച്ച പ്രതികരണമാണ് ട്രെയിലറിന് ലഭിക്കുന്നത്. അര്‍ജുന്‍ റെഡ്ഡിയോട് ചിത്രം നീതി പുലര്‍ത്തുന്നുണ്ടെന്ന് തന്നെയാണ് ആരാധകരുടെ അഭിപ്രായം.

അതോടൊപ്പം ധ്രുവിന്‍റെ പ്രകടനം വിസ്മയിപ്പിക്കുന്നതാണെന്നും ചിത്രം ഉടൻ മലയാളത്തിൽ ഇറക്കണമെന്നും ഉള്‍പ്പെടെ നിരവധി ആരാധകർ കമന്‍റുകളിട്ടിട്ടുണ്ട്. നിവിൻപോളി, ഉണ്ണി മുകുന്ദൻ, പ്രണവ് മോഹൻലാൽ, ആന്‍റണി വര്‍ഗ്ഗീസ് തുടങ്ങി നിരവധി പേരുകളാണ് ചിത്രം മലയാളത്തിൽ ഒരുക്കുന്നുണ്ടെങ്കിൽ നായകനാക്കേണ്ടവരുടെ പട്ടികയിലേക്ക് ആരാധ‍കർ നിർദ്ദേശിച്ചിരിക്കുന്നത്.