ദിലീപ്-നാദിര്‍ഷ ചിത്രം 'കേശു ഈ വീടിന്‍റെ നാഥൻ' പൂജ-സ്വിച്ച് ഓൺ നടന്നു

ദിലീപ്- നാദിര്‍ഷ കൂട്ടുകെട്ടിലൊരുങ്ങുന്ന 'കേശു ഈ വീടിന്‍റെ നാഥൻ' എന്ന സിനിമയുടെ പൂജയും സ്വിച്ച് ഓൺ കർമ്മവും നടന്നു. നാദിർഷായുടെ ഉമ്മ ആയിഷ ബീവി സ്വിച്ച് ഓൺ നടത്തി. ഹോട്ടൽ ഹൈവേ ഗാര്‍ഡനിലാണ് ചടങ്ങുകള്‍ നടന്നത്. മാര്‍ച്ച് 27 നായിരിക്കും ചിത്രം പുറത്തിറക്കുന്നതെന്നാണ് സൂചന. സിനിമയുടെ ചിത്രീകരണവും ഇന്ന് ആരംഭിക്കും.

ചടങ്ങിൽ ദിലീപ്, നാദിർഷാ, ഹരീഷ് കണാരൻ, സ്വാസിക, അബു സലീം, മജീദ്, നിർമ്മാതാവ് ആൽവിൻ തുടങ്ങി നിരവധിപേർ പങ്കെടുക്കാനായെത്തിയിരുന്നു. സിനിമാ ലോകത്ത് എത്തുന്നതിന് മുമ്പ് തന്നെ വര്‍ഷങ്ങളുടെ സൗഹൃദ ബന്ധമുള്ളവരാണ് നാദിര്‍ഷയും ദിലീപും. മിമിക്രി കലാരംഗത്ത് നിന്ന് സിനിമയിലെത്തിയവരാണ് ഇരുവരും. ശേഷം ഇരുവരും സിനിമയിൽ നടന്മാരായി. ദിലീപ് നായകവേഷങ്ങളിലൂടെ പേരെടുത്തു. നാദിര്‍ഷ അതിനിടയിൽ സംവിധാനത്തിലേക്കും കടന്നു.

Also Read: യൂട്യൂബ് ചാനലുമായി രമ്യാ നമ്പീശന്‍; ആദ്യ ഗാനമായി 'കുഹുകു'


എന്നാൽ ദിലീപിനെ നായകനാക്കി നാദിര്‍ഷ സംവിധാനം ചെയ്യുന്ന ആദ്യ ചിത്രമാണിത്. ഉര്‍വശിയാണ് ചിത്രത്തിലെ ദിലീപിന്‍റെ നായിക എന്നാണ് സൂചന. പ്രായമുള്ള കഥാപാത്രമായാണ് ദിലീപ് ചിത്രത്തിലെത്തുന്നതെന്നും സൂചനയുണ്ട്. അമര്‍ അക്ബ‍ർ അന്തോണി, കട്ടപ്പനയിലെ ഋത്വിക് റോഷൻ, മേരാ നാം ഷാജി തുടങ്ങിയവയാണ് നാദിര്‍ഷ സംവിധാനം ചെയ്ത സിനിമകള്‍.

Also Read: തെലുങ്കിൽ വില്ലൻ വേഷം ചെയ്യാൻ മമ്മൂട്ടിയെ ക്ഷണിച്ചപ്പോഴുണ്ടായ അനുഭവം വെളിപ്പെടുത്തി അല്ലു അരവിന്ദ്

‘മേരാ നാം ഷാജി’ ആണ് നാദിര്‍ഷയുടെ സംവിധാനത്തില്‍ ഒടുവില്‍ തിയറ്ററുകളില്‍ എത്തിയ ചിത്രം. റെ ജാക്ക് ഡാനിയലാണ് ഒടുവിൽ തീയേറ്ററിലെത്തിയ ദിലീപ് ചിത്രം. മൈ സാന്‍റ എന്ന ചിത്രമാണ് ക്രിസ്മസ് റിലീസായി തീയേറ്ററുകളിലെത്തുന്ന ദിലീപ് ചിത്രം. തൊണ്ടിമുതലും ദൃക്സാക്ഷിയും, സത്യം പറഞ്ഞാ വിശ്വസിക്കുവോ തുടങ്ങിയ സിനിമകൾക്ക് തിരക്കഥ ഒരുക്കിയ സജീവ് പാഴൂരാണ് സിനിമയുടെ തിരക്കഥ ഒരുക്കുന്നത്. നാദ് ഗ്രൂപ്പ് നിർമ്മിക്കുന്ന ചിത്രത്തിൽ ഛായാഗ്രഹണം അനിൽ നായർ, സംഗീത സംവിധാനം നാദിർഷ, ഗാനരചന ഹരിനാരായണൻ, ജ്യോതിഷ്, ചിത്രസംയോജനം സാജൻ, വസ്ത്രാലങ്കാരം സഖി എൽസ തുടങ്ങിയവരാണ് നിർവ്വഹിക്കുന്നത്.

• Also Watch : രജനികാന്തിന്‍റെ രാഷ്ട്രീയ പാര്‍ട്ടി ഉടൻ ?