ദിലീപിന്‍റെ 'കമ്മാരസംഭവം' കിടിലൻ ടീസര്‍ ഇതാ

ദിലീപ് നായകനാകുന്ന കമ്മാരസംഭവത്തിന്‍റെ ടീസര്‍ പുറത്തുവിട്ടു. ദിലീപ് നായകനാകുന്ന സാമ്പത്തികപരമായ ഏറ്റവും വമ്പൻ സിനിമയാണിത്. ചരിത്ര കഥയാണ് ചിത്രം പറയുന്നത്. പ്രേക്ഷകരെയൊന്നടങ്കം ഞൊട്ടിപ്പിക്കുന്ന വിധത്തിലാണ് ടീസര്‍ അണിയിച്ചൊരുക്കിയിരിക്കുന്നത്. ചിത്രത്തിൽ കമ്മാരൻ നമ്പ്യാർ എന്ന കഥാപാത്രത്തെയാണ് ദിലീപ് അവതരിപ്പിക്കുന്നത്. കമ്മാരന്‍റെ ജീവിതത്തിലുണ്ടാകുന്ന ചില സംഭവങ്ങൾ കോ‍ര്‍ത്തിണക്കിയാണ് ചിത്രത്തിന്‍റെ പ്രമേയം ഒരുക്കിയിരിക്കുന്നത്. രാമലീലയ്ക്ക് ശേഷം ദിലീപ് നായകനായി എത്തുന്ന ചിത്രമാണിത്.



രതീഷ് അമ്പാട്ട് സംവിധാനം ചെയ്യുന്ന ചിത്രത്തിന് മുരളി ഗോപിയാണ് തിരക്കഥ ഒരുക്കിയിരിക്കുന്നത്. മൂന്നു കാല ഘട്ടങ്ങളിലൂടെ സഞ്ചരിക്കുന്ന ചിത്രത്തിൽ ദിലീപ് വ്യത്യസ്ത ഗെറ്റപ്പുകളിലാണ് പ്രത്യക്ഷപ്പെടുന്നത്. നമിതാ പ്രമോദാണ് ചിത്രത്തിലെ നായിക. തമിഴ് താരങ്ങളായ സിദ്ധാർത്ഥ്, ബോബി സിംഹ എന്നിവരും മുരളീഗോപി, ഇന്ദ്രൻസ് ശ്വേത മേനോൻ എന്നിവരും ചിത്രത്തിൽ പ്രധാന വേഷങ്ങൾ കൈകാര്യം ചെയ്യുന്നുണ്ട്. തേനി, ചെന്നൈ, എറണാകുളം എന്നിവിടങ്ങളിലായാണ് ചിത്രീകരണം പൂര്‍ത്തിയാക്കിയത്. ഗോകുലം ഫിലിംസ് ആണ് ചിത്രം നിര്‍മ്മിച്ചിരിക്കുന്നത്. ദിലീപിന്‍റെ സ്വന്തം വിതരണ കമ്പനിയായ ഗ്രാൻഡ് പ്രൊഡക്ഷൻസാണ് ചിത്രം തീയേറ്ററുകളിലെത്തിക്കുന്നത്. ഏപ്രിൽ അഞ്ചിനാണ് ചിത്രം തീയേറ്ററുകളിലെത്തുക.