'ദൃശ്യം 2' തെലുങ്ക് പതിപ്പ് പാക്കപ്പായി; 47 ദിവസം നീണ്ട ചിത്രീകരണം

ആമസോൺ പ്രൈമിലൂടെ റിലീസ് ചെയ്ത് ഏറെ പ്രേക്ഷക നിരൂപക പ്രശംസ നേടിയ 'ദൃശ്യം 2' തെലുങ്ക് റീമേക്കിന്‍റെ ചിത്രീകരണം പൂര്‍ത്തിയായതായി സംവിധായകൻ ജീത്തു ജോസഫ്. സോഷ്യൽമീഡിയയിലൂടെയാണ് അദ്ദേഹം പാക്കപ്പായതായി അറിയിച്ചിരിക്കുന്നത്. മാര്‍ച്ച് 5ന് ഹൈദരാബാദില്‍ തുടങ്ങിയ ചിത്രീകരണം ഇന്നലെ തൊടുപുഴയിലാണ് അവസാനിക്കുകയുണ്ടായത്.

47 ദിവസം കൊണ്ടാണ് സിനിമയുടെ ചിത്രീകരണം പൂർത്തിയായത്. ദൈവത്തിനും സിനിമയുടെ മുഴുവൻ ടീമിനും നന്ദി എന്ന് കുറിച്ചുകൊണ്ടാണ് സിനിമ പാക്കപ്പായ വിവരം ജീത്തു അറിയിച്ചിരിക്കുന്നത്. വെങ്കിടേഷ് നായകനാകുന്ന തെലുങ്ക് പതിപ്പിൽ മലയാളത്തിൽ അഭിനയിച്ച മീനയും എസ്തേര്‍ അനിലും അഭിനയിക്കുന്നുണ്ട്. ദൃശ്യം 2 മലയാളം ഒരുക്കിയ ആശിര്‍വാദ് സിനിമാസിനൊപ്പം സുരേഷ് പ്രൊഡക്ഷന്‍സ്, രാജ്‍കുമാര്‍ തിയറ്റേഴ്സ് എന്നിവര്‍ ചേര്‍ന്നാണ് തെലുങ്കിലെ നിര്‍മ്മാണം.

Also Read: പ്രണയത്തിനായുള്ള ശ്രീരാമ യുദ്ധം ചരിത്രമാണ്; ലെഫ്റ്റനന്‍റ് റാമിന്‍റെ പ്രണയകഥയെ കുറിച്ച് ദുൽഖർ

2013ല്‍ റിലീസായ മലയാളം 'ദൃശ്യ'ത്തിനും 'ദൃശ്യം' എന്ന പേരില്‍ത്തന്നെ തെലുങ്ക് റീമേക്ക് എത്തിയിരുന്നു. ആദ്യകാല നടി ശ്രീപ്രിയയായിരുന്നു സിനിമയുടെ സംവിധാനം. ചിത്രം ബോക്സോഫീസിൽ വിജയമായിരുന്നു. ഇപ്പോള്‍ ദൃശ്യം രണ്ടാം ഭാഗം തെലുങ്കിൽ സംവിധാനം ചെയ്യുന്നത് മലയാളത്തിൽ ദൃശ്യമൊരുക്കിയ ജീത്തു ജോസഫ് തന്നെയാണ്.

Also Watch :