ദളപതി ഇനി 'ലിയോ'; "ബ്ലഡി സ്വീറ്റ്" ടൈറ്റിൽ പ്രമോയുമായി വിജയും ലോകേഷ് കനകരാജും

ഇന്ത്യൻ സിനിമ പ്രേക്ഷകർ ഏറെ കാത്തിരിക്കുന്ന, വിജയ്‍യെ നായകനാക്കി ലോകേഷ് കനകരാജ് സംവിധാനം ചെയ്യുന്ന പുതിയ ചിത്രത്തിൻ്റെ പേര് അനൗൺസ് ചെയ്തു. ആക്ഷൻ ത്രില്ലറായി ഒരുക്കുന്ന ചിത്രത്തിൻ്റെ മൂഡ് വ്യക്തമാക്കുന്ന ടൈറ്റിൽ പ്രമോ വീഡിയോയിലൂടെയാണ് 'ലിയോ' എന്നു പേര് വിളംബരം ചെയ്തിരിക്കുന്നത്. പേരിനൊപ്പം ചിത്രത്തിൻ്റെ റിലീസിംഗ് ഡേറ്റുമൊക്കെയായി ആരാധകർക്ക് ആവേശം സൃഷ്ടിച്ചാണ് ടീസർ പുറത്തിറക്കിയിരിക്കുന്നത്. വീഡിയോയിൽ വിജയ് പറയുന്ന "ബ്ലഡി സ്വീറ്റ്" എന്ന ടാഗ് ലൈനോടെയാണ് വീഡിയോ പുറത്തുവിട്ടിരിക്കുന്നത്. സാൾട്ട് ആൻഡ് പെപ്പർ ലുക്കിൽ വിജയ് എത്തുന്ന ചിത്രം 2023 ഒകടോബർ 19 ന് വേൾഡ് വൈഡ് തിയറ്ററിലെത്തും. തമിഴിനു പുറമേ തെലുങ്ക്, ഹിന്ദി, കന്നട ഭാഷകളിൽ ചിത്രം റിലീസ് ചെയ്യും. കഴിഞ്ഞ ദിവസമാണ് ചിത്രത്തിൻ്റെ ക്യാരക്ടർ പോസ്റ്ററുകൾ റിലീസ് ചെയ്തിരുന്നത്. തൃഷയാണ് ചിത്രത്തിൽ വിജയ്ക്കു നായികയായി എത്തുന്നത്. ബോളിവുഡ് താരം സഞ്ജയ് ദത്താണ് ചിത്രത്തിലെ പ്രധാന വില്ലൻ കഥാപാത്രത്തെ അവതരിപ്പിക്കുന്നത്. കെജിഎഫിനു ശേഷം സഞ്ജയ് ദത്ത് അഭിനയിക്കുന്ന സൗത്ത് ഇന്ത്യൻ ചിത്രമാണ് ലിയോ. ഇവർക്കൊപ്പം ആക്ഷൻ കിംഗ് അർജുൻ, പ്രിയ ആനന്ദ്, മിഷ്‌കിൻ, ഗൗതം മേനോൻ, മൺസൂർ അലി ഖാൻ എന്നിവരും പ്രധാന കഥാപാത്രങ്ങളാകുന്നു. മലയാളത്തിലെ യുവതാരം മാത്യു തോമസും ചിത്രത്തിലെ പ്രധാന കഥാപാത്രങ്ങളിലൊന്നാണ്. മാത്യുവിൻ്റെ ആദ്യ തമിഴ് ചിത്രമാണ് ലിയോ.

Also Read: പരിയേറും പെരുമാളിലൂടെ ശ്രദ്ധ നേടിയ 'നെല്ലൈ എം തങ്കരാസു'വിന് വിട! ആദരവ് അർപ്പിച്ച് സംവിധായകൻ മാരി ശെൽവരാജ്

സെവന്‍ സ്‌ക്രീന്‍ സ്റ്റുഡിയോസിൻ്റെ ബാനറില്‍ നിര്‍മിക്കുന്ന ബിഗ് ബജറ്റ് ചിത്രത്തിൻ്റെ ഷൂട്ടിംഗ് ജനുവരി രണ്ട് മുതല്‍ ആരംഭിച്ചിരുന്നു. വിജയുടെ 67 -ാം ചിത്രത്തിൻ്റെ ഷൂട്ടിംഗ് ഇപ്പോൾ കാശ്മീരിൽ പുരോഗമിക്കുകയാണ്. മാസ്റ്ററിനു ശേഷം വിജയും ലോകേഷ് കനകരാജും ഒന്നിക്കുന്ന ചിത്രത്തിനു വലിയ പ്രതീക്ഷയാണുള്ളത്. കൈതി, വിക്രം ചിത്രങ്ങളിലൂടെ സാധ്യമായ എൽസിയുവിൻ്റെ ഭാഗമാണോ ലിയോയും എന്നതാണ് ഇനി ആരാധകർ കാത്തിരിക്കുന്നത്. കത്തി, മാസ്റ്റര്‍, ബീസ്റ്റ് എന്നിവയില്‍ ഹിറ്റ് ഗാനങ്ങള്‍ ഒരുക്കിയ അനിരുദ്ധ് രവിചന്ദര്‍ നാലാമതും വിജയ്ക്കൊപ്പം ഒരുമിക്കുകയാണ് ഈ ചിത്രത്തിലൂടെ.

ലോകേഷ് കനകരാജിൻ്റെ മുൻ ചിത്രം വിക്രത്തിൻ്റെ സമാനമായ ടൈറ്റിൽ അനൗൺസ്മെൻ്റാണ് ലിയോയ്ക്കുമുള്ളത്. ഒറ്റയ്ക്കുള്ള നായകനെ തേടി മലഞ്ചരിവിലൂടെ എത്തുന്ന മുഖംമൂടി സംഘവും അവരെ നേരിടാൻ വാളും കയ്യിലേന്തി നിൽക്കുന്ന വിജയുടെ ലിയോയുമാണ് ടൈറ്റിൽ പ്രമോ വീഡിയോയിൽ കാണുന്നത്. വീക്രത്തിനു സമാനമായി ഹെവി ആക്ഷൻ പാക്ക്ഡ് ചിത്രമായിട്ടാണ് ലിയോ ഒരുക്കുന്നത്. ചിത്രത്തിൻ്റെ ഷൂട്ടിംഗിനു വേണ്ടി 180 ദിവസത്തെ ഡേറ്റാണ് വിജയ് നൽകിയിരിക്കുന്നത്.



കാർത്തിയുടെ ദില്ലി, കമലഹാസൻ്റെ വിക്രം, സൂര്യയുടെ റോളക്സ് എന്നീ സൂപ്പർ ഹിറ്റ് കഥാപാത്രങ്ങളുടെ ശ്രേണിയിലേക്ക് ഇനി വിജയുടെ ലിയോ കൂടി ഇടം പിടിക്കുകയാണ്. 2005 ൽ ഡേവിഡ് ക്രോണൻബർ‌ഗ് സംവിധാനം ചെയ്തെത്തിയ ഇംഗ്ലീഷ് ആക്ഷൻ ത്രില്ലർ ചിത്രം എ ഹിസ്റ്ററി ഓഫ് വയലൻസിൻ്റെ ഇൻസ്പിരേഷനാണ് വിജയ് നായകനാകുന്ന ലോകേഷ് കനകരാജിൻ്റെ പുതിയ ചിത്രമെന്നു വാർത്ത വന്നിരുന്നു. ഇന്ത്യാനയിലെ മില്ലിബ്രൂക്ക് എന്ന ചെറിയ പട്ടണത്തിൽ ഹോട്ടൽ നടത്തുന്ന ടോം സ്റ്റാളിൻ്റെ കഥയാണ് ചിത്രം പറഞ്ഞത്. ഭാര്യയും മകനും മകളുമടങ്ങുന്ന സംതൃപ്തമായ അയാളുടെ കുടുംബം. ഒരു ദിവസം രാത്രി ഹോട്ടൽ അടയ്ക്കാറായപ്പോള്‍ രണ്ട് അതിഥികള്‍ എത്തി. മാഫിയ സംഘത്തിലുള്ള ഇരുവരും ടോമിൻ്റെ ടീ ഷോപ്പിൽ പ്രശ്നങ്ങളുണ്ടാക്കുകയും പിന്നീട് അവിടെയെത്തുന്ന മാഫിയ തലവൻ അവനെ 'ബില്ലി' എന്നും വിളിക്കുന്നു. മുമ്പ് അധോലോക നായകനായിരുന്ന ബില്ലി എല്ലാം ഉപേഷിച്ച് സ്വൈര്യ ജീവിതം നയിക്കുന്നിടത്തേക്ക് വില്ലന്മാർ എത്തുന്നതോടെ തൻ്റെ വിശ്വരൂപം പുറത്തെടുക്കേണ്ടിവരുന്നു. ലിയോയും സമാനമായ പശ്ചാത്തലത്തിലാണ് ഒരുക്കുന്നതെന്നാണ് കോളിവുഡിൽ നിന്നുള്ള സൂചന.


Read Latest Malayalam Movie News And Malayalam News

Also Watch: