കാട് പൂക്കുന്നു, രക്ത നിറം കൊണ്ട് കാടുകൾ പൂക്കുന്നു: ഡോ.ബിജു

കഴിഞ്ഞ ദിവസം നിലമ്പുർ വനത്തിൽ കേരള പോലീസ് മാവോയിസ്റ്റുകളുമായി നടത്തിയ ഏറ്റുമുട്ടലിനെ വിമർശിച്ച് സംവിധായകൻ ഡോ ബിജു രംഗത്ത്. മാവോയിസ്റ്റ് എൻകൗണ്ടർ സത്യമോണോ എന്ന് വ്യക്തമാക്കണമെന്ന് ബിജു ആവശ്യപ്പെട്ടു. സുപ്രീം കോടതി വിധി അനുസരിച്ചുള്ള നടപടി ക്രമങ്ങൾ പാലിക്കാൻ കേരള പോലീസ് തയ്യാറാകണം.

പ്രതികരണങ്ങളുടെ മൗനം അപകടകരമാണ്. പണ്ട് പോലീസിനാൽ കൊല ചെയ്യപ്പെട്ട രാജനെയും മകനെക്കുറിച്ചുള്ള വിവരങ്ങൾ അന്വേഷിച്ച് നടന്ന അച്ഛൻ ഈച്ചരവാര്യരെയും ബിജു പരാമർശിക്കുന്നു. ഗൗരവപരമായ മനുഷ്യാവകാശ പ്രശ്‍നമായി വിഷയത്തെ കണ്ട് ജനാധിപത്യപരവും നിയമപരവുമായ നടപടികൾ ഉറപ്പ് വരുത്തണമെന്ന് ബിജു ആവശ്യപ്പെട്ടു.

മാവോയിസ്റ്റ് വിഷയം കൈകാര്യം ചെയ്യുന്ന സിനിമ 'കാട് പൂക്കുന്ന നേര'ത്തിന്‍റെ ഇന്ത്യയിലെ ആദ്യ പ്രദർശനം ഗോവ ചലച്ചിത്ര മേളയിൽ കഴിഞ്ഞതിൻറെ പിറ്റേ ദിവസം തെരഞ്ഞെടുപ്പ് ബഹിഷ്കരിക്കുക എന്ന പോസ്‍റ്റര്‍ ഒട്ടിച്ചതിന് ജയിലില്‍ അടക്കപ്പെട്ട ഗൗരിക്ക് ജാമ്യം കിട്ടി എന്ന നല്ല വാർത്ത കേട്ടു രണ്ടു ദിവസങ്ങൾക്ക് ശേഷം കാട്ടിനുള്ളിൽ രണ്ടു മാവോയിസ്റ്റുകളെ ഏറ്റുമുട്ടലിൽ പോലീസ് കൊലപ്പെടുത്തി എന്ന വാർത്തയും എത്തി.

കാടുകൾ പൂക്കുകയാണ്..രക്ത നിറം കൊണ്ട് കാടുകൾ പൂക്കുന്നു..ഇതിൽ എത്ര നിരപരാധികളുടെ രക്തം ഉണ്ടാകാം എന്ന ചോദ്യത്തോടെ ബിജു തന്‍റെ പോസ്‍റ്റ് അവസാനിപ്പിക്കുന്നു.



Dr. Biju stands against killing Maoists in Nilambur