ഡബ്സ്മാഷ് താരം വിഷ്ണു ഉണ്ണികൃഷ്ണൻ തമിഴിലേക്ക്

നവാഗതനായ ബിലഹരി സംവിധാനം ചെയ്ത 'ഹരം' എന്ന മ്യൂസിക് വിഡിയോയിലൂടെ പ്രശസ്തനായ ഡബ്സ്മാഷ് താരം വിഷ്ണു ഉണ്ണികൃഷ്ണൻ തമിഴ് സിനിമാ മേഖലയിൽ അരങ്ങേറുന്നു. 'എൻ4' എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് ലോകേഷ് ആണ്. സൺ ടിവിയിലൂടെ പ്രശസ്തയായ വാണി ഭോജൻ ആണ് ചിത്രത്തിലെ നായിക. അഫ്സൽ ഹമീദ്, അനുപമ കുമാർ എന്നിവരും ചിത്രത്തിൽ പ്രധാന വേഷങ്ങൾ കൈകാര്യം ചെയ്യുന്നു.ലോകേഷ് ഒരുക്കുന്ന രണ്ടാമത്തെ ചിത്രമാണ് 'എൻ4'. ചിത്രത്തിന്‍റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു.

ലോകേഷ് ഒരുക്കിയ ആദ്യ ചിത്രം 'മൈ സൺ ഈസ് ഗേ' എന്ന ചിത്രം റിലീസിന് തയ്യാറെടുത്തിരിക്കവേയാണ് അടുത്ത ചിത്രം പ്രഖ്യാപിച്ചിരിക്കുന്നത്. ചലച്ചിത്രമേളകളിൽ 'മൈ സൺ ഈസ് ഗേ' എന്ന ചിത്രം ഏറെ നിരൂപക പ്രശംസ നേടിയിരുന്നു.