ബിജോയ് നമ്പ്യാർ-ദുൽഖ‍ർ ചിത്രം 'സോളോ' വരുന്നു...

ബോളിവുഡില്‍ ശ്രദ്ധേയ ചിത്രങ്ങളൊരുക്കിയ മലയാളിസംവിധായകന്‍ ബിജോയ് നമ്പ്യാര്‍ ദുല്‍ഖറിനെ നായകനാക്കി മലയാളത്തിലൊരുക്കുന്ന ചിത്രം സോളോ ഉടൻ ചിത്രീകരണം തുടങ്ങും. ബിജോയ്‌യുടെ ആദ്യ മലയാളചിത്രമാണിത്. ബിജോയ്‌യുടെ തന്നെ നിര്‍മ്മാണകമ്പനിയായ ഗെറ്റ്എവേ ഫിലിംസും അബാം ഫിലിസും സംയുക്തമായാണ് ചിത്രം നിര്‍മ്മിക്കുന്നത്.

മലയാളത്തിലെ അരങ്ങേറ്റചിത്രത്തിലൂടെ ഇതുവരെ ആരും പരീക്ഷിക്കാത്ത ഒന്നിനാണ് ശ്രമിക്കുന്നതെന്നായിരുന്നു പ്രോജക്ടിനെക്കുറിച്ച് ബിജോയ് പറയുന്നത്. അനുരാഗ് കാശ്യപ് നിര്‍മ്മിച്ച്, രാജീവ് ഖണ്ഡേവാള്‍ നായകനായി, 2011ല്‍ പുറത്തുവന്ന 'ശെയ്ത്താന്‍' എന്ന ബോളിവുഡ് ചിത്രത്തിലൂടെയാണ് ബിജോയ് സംവിധായകനായി അരങ്ങേറ്റം കുറിക്കുന്നത്.

പിന്നീട് ഹിന്ദിയിലും ഒപ്പം തമിഴിലുമായി 'ഡേവിഡ്' എന്ന ചിത്രം അദ്ദേഹം സംവിധാനം ചെയ്തു. വിക്രമായിരുന്നു ഇതില്‍ നായകന്‍. അമിതാഭ് ബച്ചനും ഫര്‍ഹാന്‍ അക്തറും പ്രധാന കഥാപാത്രങ്ങളായി ഈ വര്‍ഷമെത്തിയ 'വസീറാ'ണ് അദ്ദേഹത്തിന്റെ അവസാന സംവിധാന സംരംഭം. 'വസീറി'ന് ശേഷം മണിരത്‌നത്തിന്റെ പുതിയ ചിത്രം 'കാട്രു വെളിയിടൈ'യുടെ ഡയറക്ഷന്‍ ഡിപ്പാര്‍ട്ട്‌മെന്റില്‍ പ്രവര്‍ത്തിക്കുകയായിരുന്നു ബിജോയ്. അതേസമയം സത്യന്‍ അന്തിക്കാട് ചിത്രം 'ജോമോന്റെ സുവിശേഷങ്ങളു'ടെ ചിത്രീകരണത്തിലാണ് ദുല്‍ഖര്‍ ഇപ്പോള്‍.