‘ഏദന്‍ പൂവേ കണ്‍മണി’ആലപിച്ച് ശാന്തികൃഷ്ണ

ഒരുകാലത്ത് മലയാളത്തിലെ മുൻനിര താരങ്ങളായ മോഹൻലാൽ, മമ്മൂട്ടി, സുരേഷ് ഗോപി തുടങ്ങിയവർക്കൊപ്പം നായികയായി തിളങ്ങിയ നടിയാണ് ശാന്തികൃഷ്ണ. നിദ്ര എന്ന ചിത്രത്തിലൂടെയാണ് ശാന്തി മലയാളത്തിൽ അരങ്ങേറ്റം കുറിച്ചത്. സവിധത്തിലെ അഭിനയത്തിന് ശാന്തിക്ക് സംസ്ഥാന അവാർഡും ലഭിച്ചു.

പിന്നീട് വിഷ്ണുലോകം, എന്നും നന്മകള്‍, ചെങ്കോല്‍, പരിണയം, പിന്‍ഗാമി തുടങ്ങിയ ചിത്രങ്ങളിലും അഭിനയിച്ചു. വിവാഹത്തോടെ സിനിമയോട് വിടപറഞ്ഞ ശാന്തി തിരിച്ചെത്തിയത് നിവിന്‍ പോളി നായകനായ ഞണ്ടുകളുടെ നാട്ടില്‍ ഒരിടവേള എന്ന ചിത്രത്തിലൂടെയാണ്.



ഇപ്പോൾ കുട്ടനാടന്‍ മാര്‍പാപ്പ എന്ന കുഞ്ചാക്കോ ബോബന്‍ ചിത്രത്തിലാണ് ശാന്തികൃഷ്ണ അഭിനയിച്ച് കൊണ്ടിരിക്കുന്നത്. ഈ ചിത്രത്തിലൂടെ പുത്തനൊരു കാൽവെപ്പ് കൂടി നടത്തുകയാണ് താരം. രാഹുല്‍ രാജിന്‍റെ സംഗീതത്തില്‍ ഒരു പാട്ട് കൂടി പാടിയിരിക്കുകയാണ് ശാന്തി. ‘ഏദന്‍ പൂവേ കണ്‍മണി’എന്നു തുടങ്ങുന്ന ഗാനമാണ് ആലപിച്ചിരിക്കുന്നത്. അമ്മയ്ക്കും മകനുമിടയിലുളള സ്‌നേഹമാണ് ഈ പാട്ട് രംഗത്തിലുള്ളത്.

നവാഗതനായ ശ്രീജിത്ത് വിജയന്‍ സംവിധാനം ചെയ്യുന്ന ചിത്രമാണ് കുട്ടനാടന്‍ മാര്‍പാപ്പ. അദിഥി രവിയാണ് നായിക. അജുവര്‍ഗീസ്, സൗബിന്‍ ഷാഹിര്‍ എന്നിവരും ചിത്രത്തിൽ അഭിനയിക്കുന്നുണ്ട്.