'ലവകുശ'യിലൂടെ പുനര്‍ജ്ജനി നേടി 'എന്‍റെ കയ്യില്‍ ഒന്നുമില്ല' ഗാനം

ഒരുകാലത്ത് കേരളക്കരയിലെ യുവത്വം മൂളി നടന്ന 'എന്‍റെ കയ്യില്‍ ഒന്നുമില്ല' എന്ന ആൽബം ഗാനത്തിന് 'ലവകുശ'യിലൂടെ പുനര്‍ജ്ജനി. നീരജ് മാധവും അജു വര്‍ഗ്ഗീസും ചേര്‍ന്നഭിനയിച്ച് കഴിഞ്ഞദിവസം പുറത്തിറങ്ങിയ ചിത്രത്തിലാണ് ഈ ഗാനം ഉപയോഗിച്ചിരിക്കുന്നത്. രണ്ട് സുഹൃത്തുക്കളുടെ കഥ പറഞ്ഞ ചിത്രം തീയ്യേറ്ററുകളിൽ നിന്ന് സമ്മിശ്ര അഭിപ്രായമാണ് നേടുന്നത്. അതുല്‍ പി എം(മുന്ന) ആണ്‌ 'എന്‍റെ കയ്യില്‍ ഒന്നുമില്ല' ഗാനം എഴുതി ഈണമിട്ട് പാടിയിരിക്കുന്നത്.

ഈ ഗാനം ചിത്രത്തിലേക്കെടുക്കാൻ ഉണ്ടായ സാഹചര്യം വിശദമാക്കിക്കൊണ്ടാണ് നീരജ് ഈ ഗാനം പുറത്ത് വിട്ടത്. താരത്തി​ന്‍റെ ഫേസ്ബുക്കിലൂടെയാണ് സാഹചര്യം വ്യക്തമാക്കിയത്. രണ്ടു കൊല്ലം മുൻപ് പാട്ട് കേട്ടപ്പോൾ തന്നെ ഒരുപാട് ഇഷ്ടമായെന്നും പിന്നണിപ്രവർത്തകരെ അഭിനന്ദിക്കണമെന്നുണ്ടായിരുന്നെന്നും നീരജ് കുറിച്ചു. ​ പിന്നീട്‌ 'ലവകുശ'യ്ക്‌ തിരക്കഥയെഴുതുമ്പോൾ പടത്തിലെ ഒരു സാഹചര്യത്തിൽ ഈ പാട്ട്‌ വളരെ അന്വർത്ഥമായിട്ട്‌ തോന്നി, അങ്ങനെ ഈ പാട്ടിനു ഈണമിട്ട്‌ പാടിയ വ്യക്തിയെ തന്നെ തേടി കണ്ടു പിടിച്ച്‌ അവകാശം വാങ്ങുകയും പാട്ട്‌ റീറെക്കോര്‍ഡ് ചെയ്യുകയുമായിരുന്നെന്ന് നീരജ് പറഞ്ഞു. ചില പാട്ടുകൾ അങ്ങനെയാണു, അതിന്‍റെ ഫീൽ റീക്രിയേറ്റ് ചെയാൻ പറ്റില്ലെന്നും താരം പറയുന്നു.



പണത്തിന് ബുദ്ധിമുട്ട് അനുഭവപ്പെടുന്ന അവസരത്തിൽ അജുവിന്‍റെയും നീരജിന്‍റെയും കഥാപാത്രങ്ങൾ പണത്തിനായി തരികിട ജോലികൾ ചെയ്യുന്നതും പഴയ കാമുകിയുടെ മുന്നിൽ പെടുന്നതുമെല്ലാം വളരെ രസകരമായാണ് ഗാനരംഗത്തിൽ ചിത്രീകരിച്ചിക്കുന്നത്. 'നീകൊഞാചാ' എന്ന ചിത്രത്തിന് ശേഷം ഗിരീഷ് മനോ ഒരുക്കിയ ചിത്രമാണ് ഇത്. നീരജ് മാധവ് തന്നെയാണു ചിത്രത്തിന്‍റെ കഥയും തിരക്കഥയും ഒരുക്കിയിരിക്കുന്നത്.




'Ente Kayyil Onnumilla' Album Song reused in Lavakusha

'Ente Kayyil Onnumilla' Album Song reused in New Malayalam Movie Lavakusha; Starred Aju Varghese And Neeraj Madhav