സ്പൂഫ് വീഡിയോ എന്ന ആശയത്തിലേക്ക് എത്തിയത്?
തിരുവനന്തപുരം പെരിങ്ങുഴിയാണ് ഞങ്ങളുടെ സ്വദേശം. ജോമോൻ, ശ്രീരാജ്, അഖിൽ, വിഷ്ണു, സുബിൻ, സുഹൈൽ ഞങ്ങളാണ് ആടലോടകം ടീമിലുള്ളത്. ടിക് ടോക് വീഡിയോകള് ചെയ്തായിരുന്നു ഞങ്ങളുടെ തുടക്കം. ബിഗ് ബി സ്ഫൂഫാക്കാനുള്ള ഐഡിയ കുറെ നാളായി മനസ്സിലുണ്ട്. പക്ഷേ ടിക് ടോകിൽ ഒരു മിനിറ്റ് വീഡിയോ മാത്രമല്ലേ പറ്റുകയുള്ളൂ. ഞങ്ങൾ ഉദ്ദേശിച്ച സ്പൂഫ് ഒരു മിനിറ്റിൽ നിൽക്കില്ലായിരുന്നു. ആ സമയത്താണ് ടിക് ടോക് നിര്ത്തലാക്കിയത്. അങ്ങനെ ഞങ്ങൾ ഒരു ഭാഗ്യ പരീക്ഷണം എന്ന നിലയിൽ ഒരു യൂട്യൂബ് ചാനൽ തുടങ്ങി. ടിക് ടോക് പോയി, ആരും ചിന്തിക്കാത്ത ഫ്രഷ് ഐഡിയയും ആയി ഞങ്ങൾ വരുന്നു എന്ന് പറഞ്ഞാണ് ഞങ്ങള് യൂട്യൂബ് ചാനലിന് ഒരു കര്ട്ടൻ റൈസര് വീഡിയോ ഇട്ടിരുന്നു. അത് അത്യാവശ്യം ശ്രദ്ധിക്കപ്പെട്ടു. ബിഗ് ബിയിലെ ക്ലൈമാക്സ് റിയലായി സംഭവിക്കുകയാണെങ്കിൽ എങ്ങനെയായിരിക്കും എന്ന ഒരു എലമെന്റിലാണ് ഞങ്ങള് സ്പൂഫ് വീഡിയോ ചെയ്തത്. ബിഗ് ബിയിലെ പ്രധാന ആകര്ഷണം അതിലെ സ്ലോ മോഷൻ സീനുകളായിരുന്നല്ലോ. സ്ലോ ബി എന്ന പേരിൽ അങ്ങനെ ആദ്യ വീഡിയോ ഇറക്കി. അതിന് വലിയ പിന്തുണയാണ് സോഷ്യൽമീഡിയിയൽ ലഭിച്ചത്.
സ്ലോ ബിയും ജലസിംഹവും ഒരുക്കിയത്?
സ്ലോ ബി അത്യാവശ്യം ക്ലിക്കായതോടെ ജലസിംഹവുമായി എത്തുകയായിരുന്നു. ഒരു പക്ഷേ സ്ലോ ബി ശ്രദ്ധിക്കപ്പെട്ടില്ലെങ്കിൽ ജലസിംഹം ചെയ്യാനുള്ള ആവേശം ഞങ്ങള്ക്ക് ലഭിക്കുകയില്ലായിരുന്നു. ചെറിയൊരു സ്ക്രിപ്റ്റ് ഒരുക്കിയാണ് ഞങ്ങള് സ്പൂഫ് ചെയ്യുന്നത്. ബാക്കിയൊക്കെ മനസ്സിലാണ്. ഷൂട്ടിനിടയിൽ വരുന്ന കൗണ്ടറുകള് നല്ലതാണെങ്കിൽ അങ്ങനെ തന്നെ ഉപയോഗിക്കും. സ്ലോ ബി രണ്ട് മണിക്കൂര് കൊണ്ടാണ് ഷൂട്ട് ചെയ്തത്. ജലസിംഹത്തിന് രണ്ട് ദിവസമെടുത്തു. ഞങ്ങളുടെ നാട്ടുകാര് തന്നെയാണ് അഭിനയിച്ചിരിക്കുന്ന എല്ലാവരും. സീറോ ബജറ്റായാണ് ഞങ്ങള് ഈ സ്പൂഫ് വീഡിയോകള് ഒരുക്കിയത്. അരവിന്ദ്, അഭിലാഷ്, സൂരജ് എന്നിവരാണ് ക്യാമറ ചെയ്തത്. എഡിറ്റിങ്ങ് ശ്രീരാജാണ്. ഇവന്റ് മാനേജ്മെന്റ് മേഖലയിൽ ജോലിയെടുക്കുന്നവരാണ് ഞങ്ങള്. കൊവിഡ് കാലത്ത് ജോലി കുറഞ്ഞതോടെ കൂടുതൽ സമയവും ഷൂട്ടിന്റെ പിറകെ ആയിരുന്നു. ശ്രീരാജ് മാത്രമാണ് ഫിലിം ഇൻഡസ്ട്രിയിൽ മുൻ പരിചയമുള്ളയാള്.
കൊറോണക്കാലത്തെ നേരമ്പോക്കായിരുന്നോ?
ഞങ്ങള് പഠിക്കുന്ന കാലം മുതൽ കലോത്സവ വേദികളിൽ മിമിക്രിയിലും മോണോ ആക്ടിലും നാടകത്തിലുമൊക്കെ സജീവമായിരുന്നു. വലുതായപ്പോള് ജോലിയും മറ്റുമൊക്കെയായി എല്ലാവരും തിരക്കായി. ഇടവേളയിൽ ഇടയ്ക്ക് ടിക് ടോക് വീഡിയോകള് ചെയ്തിരുന്നു. ഇപ്പോള് ഈ കൊറോണ കാലമായതോടെ എല്ലാവര്ക്കും കുറെ സമയം കിട്ടി. അങ്ങനെ ഞങ്ങള് ഈ സമയം രസകരമായി ചിലഴിക്കാൻ തീരുമാനിക്കുകയായിരുന്നു. നാട്ടിലെ കലാകാരന്മാരെ തന്നെയാണ് അഭിനയിപ്പിച്ചത്. കാണുന്നവരെ രസിപ്പിക്കണം അത്രമാത്രമാണ് ഉദ്ദേശിച്ചത്. ഇപ്പോള് ഈ രണ്ട് സ്പൂഫ് വീഡിയോകള് കണ്ടപ്പോള് തന്നെ ചില സിനിമകളുടെ സ്പൂഫ് ചെയ്യണമെന്ന് പറഞ്ഞ് കമന്റുകള് പലരും ഇട്ടിട്ടുണ്ട്. ഞങ്ങള് സ്പൂഫ് വീഡിയോകളിൽ മാത്രം ഒതുക്കുന്നില്ല. ഇനി രസകരമായ മറ്റ് വീഡിയോകളും ചെയ്യുന്നുണ്ട്. അതിന്റെ ഭാഗമായി ഗ്രേസറികോട്ട എന്നൊരു വീഡിയോ ഒരുക്കുന്നുമുണ്ട്.
Also Read: വിനായകൻ ഇനി സംവിധായകൻ; ആദ്യ സിനിമ 'പാര്ട്ടി' പ്രഖ്യാപിച്ചു
ആടലോടകം എന്ന പേരിലേക്ക് എത്തിയത്?
ഞങ്ങള് കുറെ നാടൻ പേരുകള് യൂട്യൂബ് ചാനലിനായി ആലോചിച്ചിരുന്നു. ഞങ്ങള് കമ്പനിയടിച്ച് സംസാരിക്കുന്ന സ്ഥലത്ത് ആടലോടകം ചെടി ധാരാളമുണ്ട്. അങ്ങനെയാണ് ആടലോടകം എന്നായാലോ പേരെന്ന് ഒരു അഭിപ്രായം വന്നത്. ആദ്യം ചിലര്ക്ക് എതിരഭിപ്രായം ഉണ്ടായിരുന്നു. അവസാനം എല്ലാവരും ഓകെയായി. ഞങ്ങളുടെ നാടിന്റെ സൗന്ദര്യം കൂടി ഓരോ വീഡിയോകളിലും ഞങ്ങൾ അവതരിപ്പിക്കാൻ ശ്രമിച്ചിട്ടുണ്ട്. പെരുമാതുറ പൊഴി, പെരുങ്ങുഴി കായൽ എന്നിവിടങ്ങളിലാണ് ഞങ്ങള് സ്ലോ ബിയും ജലസിംഹവുമൊക്കെ ഷൂട്ട് ചെയ്തത്.
ഫാൻസുകാരും ട്രോളന്മാരും?
ഫാൻസുകാരെ നല്ല പേടിയുണ്ടായിരുന്നു. മമ്മൂക്കയുടേയും ലാലേട്ടന്റയും കഥാപാത്രങ്ങളെ എടുക്കുന്നതിനാൽ തന്നെ ഫാൻസ് ഏതു തരത്തിൽ സ്വീകരിക്കുമെന്ന പേടിയുണ്ടായിരുന്നു. പക്ഷേ പേടിച്ചതുപോലെയൊന്നും സംഭവിച്ചില്ല. എല്ലാവരും പോസിറ്റീവായി എടുത്തു. ടെക്നിക്കൽ പെര്ഫെക്ഷൻ കുറച്ച് കൂടി ശരിയാക്കണമെന്ന് ചിലര് അഭിപ്രായങ്ങള് പറഞ്ഞുവെങ്കിലും ഫാൻസുകാര് എന്ന രീതിയിൽ വേറൊരു തരത്തിലുള്ള കമന്റുകളും ഇതുവരെ വന്നിട്ടില്ല. പിന്നെ ട്രോളന്മാര്, അവരില്ലെങ്കിൽ ഞങ്ങളില്ല. അവരിലൂടെയാണ് ഈ വീഡിയോകള് കൂടുതൽ ആളുകള് കാണാനിടയായത്. സ്പൂഫ് വീഡിയോയിലെ ഡയലോഗുകളൊക്കെയെടുത്ത് അവര് ട്രോളാക്കിയത് ഏറെ ഗുണം ചെയ്തു. യൂട്യൂബിൽ സ്ലോ ബിക്ക് അഞ്ച് ലക്ഷത്തിലേറെ കാഴ്ചക്കാരെ ലഭിച്ചു. ജലസിംഹത്തിന് ഏഴ് ലക്ഷത്തിലേറെയും.
എങ്ങനെയുണ്ട് പ്രതികരണങ്ങൾ?
സംവിധായകൻ ജൂഡ് ആന്റണി വിളിച്ച് അഭിനന്ദിച്ചിരുന്നു. പിന്നെ നടനും മിമിക്രി താരവുമായ നോബി ചേട്ടൻ വിളിച്ചു. പതിനെട്ടാം പടി സിനിമയിലെ കുറെ താരങ്ങള് വിളിച്ച് നല്ലത് പറഞ്ഞു. ആ സിനിമയിൽ അഭിനയിച്ചിരുന്ന ജോമോൻ ഞങ്ങളുടെ വീഡിയോകളിലും അഭിനയിച്ചിട്ടുണ്ട്. കൂടാതെ സോഷ്യൽമീഡിയയിൽ നിരവധി പേര് എറ്റെടുത്തു, ഷെയര് ചെയ്യുന്നുണ്ട്. അത് തരുന്ന സന്തോഷം വളരെ വലുതാണ്. സിനിമകളുടെ സ്പൂഫ് ചെയ്യുമ്പോള് നമുക്ക് ആ സിനിമയിലെ അതേ രീതിയിൽ തന്നെ ക്യാമറ ആങ്കിളും രംഗങ്ങളുമൊക്കെ എടുത്താൽ മതിയല്ലോ, അതിനാൽ സിനിമയുടെ സ്പൂഫ് ചെയ്യാതെ ഒരു പടി കൂടി കടന്ന് ഞങ്ങളുടെ സ്വന്തം ക്യാമറ ആങ്കിളും ക്രിയേറ്റിവിറ്റിയുമുള്ള പുതിയ വീഡിയോകളുടെ പണിപ്പുരയിലാണിപ്പോള്. ജനങ്ങള്ക്കിടയിൽ ലഭിച്ച ഈ സ്വീകര്യത കൂടൂതൽ വീഡിയോകള് ഇനിയും ചെയ്യാൻ ഏറെ പ്രചോദനം തരുന്നുണ്ട്, 'ആടലോടകം' ടീം പറയുകയാണ്.
Also Read: 'വേട്ടക്കാർ തന്നെ ചിലപ്പോൾ വേട്ടയാടപ്പെടാം'! കുഞ്ചാക്കോയും ജോജുവും നിമിഷയും ഒന്നിക്കുന്ന 'നായാട്ട്'