സസ്പെന്‍സ് ത്രില്ലറുമായി ഫഹദ്; 'കാര്‍ബണ്‍' ടീസര്‍ കാണാം

ഫഹദ് ഫാസിലിനെ നായകനാക്കി വേണു സംവിധാനം ചെയ്യുന്ന കാര്‍ബണിന്‍റെ ടീസര്‍ പുറത്തുവിട്ടു. മംമ്തയാണ് ചിത്രത്തിലെ നായിക. സസ്പെന്‍സ് ത്രില്ലറായാണ് ചിത്രം ഒരുക്കിയിരിക്കുന്നത്. വേണു തന്നെയാണ് ചിത്രത്തിന് തിരക്കഥ രചിച്ചിരിക്കുന്നത്. ഷാരൂഖ് ഖാന്‍റെ റയീസ്, ഹാരി മെറ്റ് സജാല്‍ എന്നീ സിനിമകള്‍ക്ക് ക്യാമറ ചലിപ്പിച്ച ബോളിവുഡ് ഛായാഗ്രാഹകൻ കെ യു മോഹനനാണ് കാര്‍ബണിന്‍റെ ക്യാമറയ്ക്ക് പിന്നിൽ. ബോളിവുഡിലെ വിഖ്യാത സംവിധായകനും സംഗീത സംവിധായകനുമായ വിശാല്‍ ഭരദ്വാജ് ചിത്രത്തിലെ ഗാനങ്ങൾക്ക് ഈണമൊരുക്കിയിരിക്കുന്നു.

ദിലീഷ് പോത്തന്‍, മണികണ്ഠന്‍ ആചാരി, സൗബിന്‍ ഷാഹിര്‍, നെടുമുടി വേണു, വിജയരാഘവന്‍, സ്ഫടികം ജോര്‍ജ് എന്നിവരാണ് ചിത്രത്തിലെ മറ്റ് താരങ്ങള്‍. മമ്മൂട്ടിയെ നായകനാക്കി ഒരുക്കിയ മുന്നറിയിപ്പിന് ശേഷം വേണു സംവിധാനം ചെയ്യുന്ന ചിത്രമാണിത്. സിബി തോട്ടുപുറം, നാവിസ് സേവ്യര്‍ എന്നിവര്‍ ചേര്‍ന്നാണ് സിനിമ നിര്‍മിക്കുന്നത്.