കലാഭവന്‍ മണിയുടെ കുടുംബം സമരം പിന്‍വലിച്ചു

അന്തരിച്ച നടന്‍ കലാഭവന്‍ മണിയുടെ മരണത്തിലെ ദുരൂഹത നീക്കണമെന്നാവശ്യപ്പെട്ട് കുടുംബാംഗങ്ങള്‍ നടത്താനിരുന്ന ഉപവാസ സമരം പിന്‍വലിച്ചു. മണിയുടെ മരണവുമായി ബന്ധപ്പെട്ട അന്വേഷണം ഊര്‍ജ്ജിതപ്പെടുത്താമെന്ന് മന്ത്രിതലത്തില്‍ ഉറപ്പ് ലഭിച്ചതിനെ തുടര്‍ന്നാണ് സമരം ഉപേക്ഷിച്ചത്. ഇക്കാര്യത്തില്‍ വേണ്ട നടപടികള്‍ സ്വീകരിക്കാമെന്ന് മന്ത്രി എസി മൊയ്തീന്‍ കുടുംബാംഗങ്ങളെ അറിയിച്ചു.

ശനിയാഴ്ച ചാലക്കുടിയിലാണ് കുടുംബം ഉപവാസ സമരം നടത്താനിരുന്നത്. സര്‍ക്കാരിന്റെ ഭാഗത്ത് നിന്ന് വേണ്ട നടപടികളുണ്ടാകുമെന്ന് പ്രതീക്ഷിക്കുന്നതായി ആര്‍എല്‍വി രാമകൃഷ്ണന്‍ പറഞ്ഞു.