ഒടിടി സിനിമകളിൽ സഹകരിച്ചാൽ വിലക്ക്; നടൻ ഫഹദ് ഫാസിലിനെ ഫിയോക്ക് താക്കീത് ചെയ്തതായി സൂചന

ഒടിടിയിൽ റിലീസാകുന്ന സിനിമകളുമായി സഹകരിച്ചാൽ ഫഹദ് ഫാസിൽ ചിത്രങ്ങൾ തീയേറ്ററിൽ റിലീസ് ചെയ്യാൻ അനുവദിക്കില്ലെന്ന് ഫിയോക്ക്. ഇനി ഒടിടി റിലീസുകളോട് സഹകരിച്ചാൽ ചെയ്താൽ ഫഹദിന്‍റെ മെയ് റിലീസായ മാലിക്ക് ഉൾപ്പടെയുള്ള സിനിമകളുടെ പ്രദർശനത്തിന് വലിയ രീതിയിലുള്ള തടസ്സങ്ങൾ നേരിടേണ്ടി വരുമെന്ന് സംഘടന മുന്നറിയിപ്പ് നൽകിയിരിക്കുകയാണെന്നാണ് അദ്ദേഹവുമായി ബന്ധപ്പെട്ട വൃത്തങ്ങൾ തരുന്ന സൂചന.

ഫഹദ് അഭിനയിച്ച സീ യു സൂൺ, ഇരുള്‍, ജോജി തുടങ്ങിയ സിനിമകള്‍ തുടർച്ചയായി ഒടിടിയിൽ റിലീസ് ചെയ്യുകയും പ്രേക്ഷക ശ്രദ്ധ നേടുകയും ചെയ്യുന്ന സാഹചര്യത്തിലാണ് ഫിയോക്ക് ഈ മുന്നറിയിപ്പ് നൽകിയിരിക്കുന്നത്. ഫഹദ് ഫാസിൽ നായകനായ മാലിക് റംസാൻ ചിത്രമായി തീയേറ്ററുകളിൽ പ്രദർശിപ്പിക്കുവാൻ ഇരിക്കേയാണ് ഫിയോക്ക് ഇത്തരത്തിൽ നിലപാടെടുത്തിരിക്കുന്നതെന്നതും ശ്രദ്ധേയമാണ്.

Also Read: 'പറ്റുമെങ്കിൽ ചേട്ടൻ ഇത് ഡിലീറ്റ് ചെയ്യണം, ഒരു നാൾ താങ്കളും മരിക്കേണ്ടതല്ലേ'; ആരാധകൻ്റെ കമൻ്റിന് ഉണ്ണി മുകുന്ദൻ്റെ മറുപടി!

പുതിയ ഫിയോക്ക് സമിതിയുടെ ആദ്യ യോഗത്തിന് ശേഷമാണ് ഈ തീരുമാനം ഉണ്ടായിരിക്കുന്നത്. നെറ്റ്ഫ്ലിക്സ്, ആമസോൺ പ്രൈം എന്നീ ഓൺലൈൻ പ്ലാറ്റ്‌ഫോമുകളിലൂടെയാണ് അടുത്തിടെ ഫഹദിന്‍റെ സിനിമകള്‍ റിലീസ് ചെയ്തിരുന്നത്. അതോടൊപ്പം തന്നെ ആമസോൺ പ്രൈമിൽ റിലീസ് ചെയ്ത മോഹൻലാൽ, ജീത്തു ജോസഫ് ചിത്രം ദൃശ്യം 2 തീയേറ്ററുകളിൽ പ്രദർശിപ്പിക്കേണ്ടെന്നും സമിതി തീരുമാനമറിയിച്ചതായി റിപ്പോർട്ടുണ്ട്.

എന്നാൽ അടുത്തിടെ ഫഹദ് ഫാസിൽ അഭിനയിച്ച സിനിമകൾ ഒടിടിയിൽ റിലീസ് ചെയ്യുന്ന സാഹചര്യത്തിൽ ഇതിൽ വിശദീകരണം അറിയുന്നതിനായി ഫഹദിനെ ഫോണിൽ ബന്ധപ്പെടുക മാത്രം ചെയ്തതാണെന്നാണ് ഫിയോക്ക് അംഗങ്ങൾ അറിയിച്ചിട്ടുള്ളതെന്ന് മനോരമ ഓൺലൈൻ റിപ്പോർട്ട് ചെയ്തിട്ടുണ്ട്.

Also Watch :