പൊട്ടിക്കരഞ്ഞ് താരങ്ങൾ; ജിഷയുടെ അമ്മയോടൊപ്പമുള്ള വികാരഭരിതമായ രംഗങ്ങൾ

പെരുമ്പാവൂ‍ർ: ക്രൂരമായി കൊലചെയ്യപ്പെട്ട ജിഷയുടെ മാതാവിന്റെ നിലവിളി താങ്ങാന്‍ പോലുമാകാത്ത നിലയിലാണ് മലയാളികള്‍. മകള്‍ പോയതിൻെറ ദുഃഖം താങ്ങാന്‍ കഴിയാതെ പെരുമ്പാവൂ‍ർ ആശുപത്രിയില്‍ കഴിയുന്ന ജിഷയുടെ മാതാവിനെ കാണാന്‍ രാഷ്ട്രീയ സിനിമ സാമൂഹ്യ രംഗങ്ങളിലെ പ്രമുഖര്‍ എത്തി.

ഇന്നലെ രാജ്യസഭാംഗം സുരേഷ് ഗോപി ജിഷയുടെ മാതാവിനെ കാണാന്‍ പെരുമ്പാവൂർ ആശുപത്രിയില്‍ എത്തിയിരുന്നു. ആശ്വസിപ്പിക്കാനെത്തിയ താരത്തെ കണ്ടപ്പോള്‍ ജിഷയുടെ അമ്മ രാജേശ്വരി കെട്ടിപ്പിട്ടിച്ച്‌ അലമുറയിട്ടും നിലവിളിച്ചു. ഒരുനിമിഷം സുരേഷ് ഗോപിയും എന്തുപറയണമെന്നറിയാതെ സ്തംഭിച്ചു പോയി. ജിഷയെ ക്രൂരബലാല്‍സംഗത്തിന് ഇരയാക്കി കൊലപ്പെടുത്തിയത് പിശാചുക്കളാണെന്നായിരുന്നു സുരേഷ് ഗോപിയുടെ പ്രതികരണം. ഇത്തരം സംഭവങ്ങള്‍ കോടതികള്‍ കണ്ണുതുറന്ന് കാണണമെന്നും സുരേഷ് ഗോപി ആവശ്യപ്പെട്ടു. പീഡനക്കേസുകളില്‍ ഉടന്‍ തീര്‍പ്പുകല്‍പ്പിക്കാന്‍ പ്രത്യേക കോടതിയും സംവിധാനങ്ങളും ആവശ്യമാണ്. പെരുമ്പാവൂ‍ർ സംഭവം പ്രധാനമന്ത്രിയുടെ ശ്രദ്ധയില്‍പെടുത്തിയിട്ടുണ്ടെന്നും സുരേഷ് ഗോപി അറിയിച്ചു.

പെരുമ്പാവൂ‍ർകാരനായ നടന്‍ ജയറാമിന് ആ മാതാവിന്റെ നിലവിളി കണ്ട് പിടിച്ചു നില്‍ക്കാന്‍ സാധിച്ചില്ല. ജിഷയുടെ അമ്മയ്ക്കൊപ്പം ജയറാമും പൊട്ടിക്കരഞ്ഞു. സംഭവത്തെ കുറിച്ച്‌ ജയറാം ഫേസ്ബുക്കില്‍ കുറിച്ചത് ഇങ്ങനെയാണ്.


സ്വന്തം വീടിന്റെ ഉള്ളില്‍പ്പോലും ഒരു പെണ്‍കുട്ടി സുരക്ഷിതയല്ല എന്ന തിരിച്ചറിവ് എന്നെപ്പോലെ പെൺമക്കളുള്ള എല്ലാ അച്ഛനമ്മമാരുടേയും തീരാവേദനയാണെന്ന് നടന്‍ ദിലീപ്. "ഡല്‍ഹിയും, പെരുമ്പാവൂരും അത്ര ദൂരെയല്ലെന്ന് നമ്മള്‍ അറിയുന്നു. ആരെയാണു നമ്മള്‍ രക്ഷകരായ് കാണേണ്ടത്? ഗോവിന്ദച്ചാമിമാര്‍ തിന്നുകൊഴുത്ത് ജയിലുകളില്‍ ഇന്നും ജീവനോടെ ഇരിക്കുന്നതിന് ആരാണു കാരണക്കാര്‍, നമ്മള്‍ തന്നെ, നമ്മള്‍ അനുഭവിക്കുന്ന സ്വാതന്ത്ര്യം! അതെ കൊടുംകുറ്റവാളികള്‍ പോലും നമ്മുടെ നിയമവ്യവസ്ഥയുടെ "ലൂപ്പ് ഹോള്‍സി"ലൂടെ ആയുസ്സ് നീട്ടിക്കൊണ്ടു പോകുന്നു, അതുകൊണ്ടുതന്നെ കൊടുംക്രൂരതകള്‍ വീണ്ടും അരങ്ങേറുന്നു", ഇതിനൊരു മാറ്റം വേണ്ടേ എന്നും ദിലീപ് ചോദിക്കുന്നു. വാട്ട്സ് ആപ്പില്‍ നിന്നും ലഭിച്ച ഒരു ചിത്രം സഹിതമാണ് ദിലീപ് ഫെയ്സ് ബുക്ക് പോസ്റ്റ് ഇട്ടിരിക്കുന്നത്.



നവ്യനായ‍ർ, കാവ്യമാധവൻ, ദുൽഖ‍ർ സൽമാൻ, പേളിമാണി, പൃഥ്വിരാജ്, ജോയ് മാത്യൂ എന്നിവ‍ർ സൈബർ സ്പേസുകളിൽ തങ്ങളുടെ പ്രതിഷേധം രേഖപ്പെടുത്തി.