സുന്ദരമായ മോഷന്‍ പോസ്റ്ററുമായി 'ഹലാല്‍ ലൗ സ്റ്റോറി' ടീം; ചിത്രം ഒക്ടോബര്‍ 15ന്‌ ആമസോണ്‍ പ്രൈമിലെത്തും!

സുഡാനി ഫ്രം നൈജീരിക്ക് ശേഷം സക്കറിയ സംവിധാനം ചെയ്യുന്ന ഹലാല്‍ ലവ് സ്റ്റോറിയുടെ മോഷന്‍ പോസ്റ്റര്‍ പുറത്തിറങ്ങി. ആമസോണ്‍ പ്രൈമില്‍ ഒക്ടോബര്‍ 15 ന്‌ സിനിമ വേള്‍ഡ് വൈഡായി റിലീസ് ചെയ്യുമെന്ന് അറിയിക്കുന്നതാണ് പുതിയ മോഷൻ പോസ്റ്റർ. പപ്പായ സിനിമാസിന്റെ ബാനറിന്‍ ആഷിഖ് അബു, ജെസ്‌ന ആശിം, ഹര്‍ഷദ് അലി എന്നിവര്‍ ചേര്‍ന്ന് നിര്‍മ്മിച്ച് സക്കറിയ സംവിധാനം ചെയ്യുന്ന സിനിമയാണു ഹലാല്‍ ലൗ സ്റ്റോറി. ഇന്ദ്രജിത്ത് സുകുമാരന്‍, ജോജു ജോര്‍ജ്, ഗ്രേസ് ആന്‍റണി, ഷറഫുദ്ദീന്‍, സൌബിന്‍ ഷാഹിര്‍, പാര്‍വതി തിരുവോത്ത് തുടങ്ങി പ്രധാന താരങ്ങളെല്ലാം പോസ്റ്ററിലുണ്ട്.

Also Read: ബോബിയുടെ ഓഫീസിൽ നടന്ന മോഷണം സിനിമയാക്കി

ചിത്രത്തിൽ അതിഥി വേഷത്തിലാണ് എത്തുക എന്ന് നേരത്തേ നടി പാർവതി പറഞ്ഞിരുന്നു. സംവിധായകന്‍ സക്കരിയയും മുഹ്സിന്‍ പരാരിയും ചേര്‍ന്നാണ് ചിത്രത്തിന്‍റെ രചന നിര്‍വഹിച്ചിരിക്കുന്നത്. സൈജു ശ്രീധരന്‍ എഡിറ്റിംഗും അജയ് മേനോന്‍ ചായാഗ്രഹണവും നിർവ്വഹിക്കുന്നു. ചിത്രത്തില്‍ ബിജിബാല്‍, ഷഹബാസ് അമന്‍, റെക്സ് വിജയന്‍, യാക്സണ്‍ ഗാരി പെരേര, നേഹ നായര്‍ എന്നിവര്‍ ചേര്‍ന്നാണ്‌ സംഗീതം ഒരുക്കിയിരിക്കുന്നത്. സിനിമയുടെ കലാസംവിധാനം അനീസ് നാടോടിയാണ് നിർവഹിച്ചിരിക്കുന്നത്. റോണക്‌സ് സേവിയറാണ് മേക്കപ്പ് കൈകാര്യം ചെയ്തിരിക്കുന്നത്. കോറൈറ്റർ - ആഷിഫ് കക്കോടിയാണ്.

Also Read: 'കടുവാക്കുന്നേൽ കുറുവച്ചൻ' ഉടൻ വരും; ക്യാരക്ടർ ലുക്കിൽ പൃഥ്വി

സക്കറിയ, മുഹ്സിൻ പരാരി, സൈജു ശ്രീദ്ധരൻ, അജയ് മേനോൻ എന്നിവരാണ് കോ പ്രോഡ്യൂസർസ്. ചിത്രത്തിലെ മുൻപ് പുറത്തിറങ്ങിയ ഗാനം ഏറെ ശ്രദ്ധ നേടിയിരുന്നു. സുന്ദരനായവനേ എന്ന് തുടങ്ങുന്ന ഗാനമായിരുന്നു അണിയറപ്രവർത്തകർ പുറത്ത് വിട്ടത്. പി ആർ ഒ ആതിര ദിൽജിത്ത്.