പൃഥ്വിരാജിൻ്റെ 'ലൂസിഫറി'ൽ മോഹൻലാലിനൊപ്പം ഹിറ്റ് സംവിധായകനും

മോഹന്‍ലാലിനെ നായകനാക്കി പൃഥ്വിരാജ് ആദ്യമായി സംവിധാനം ചെയ്യുന്ന ലൂസിഫറിൽ ഹിറ്റ് സംവിധായകനായ ഫാസിൽ അഭിനയിക്കും. ഒരു വൈദികന്‍റെ വേഷമാണ് ചിത്രത്തിൽ ഫാസിലിനായി പൃഥ്വിരാജ് മാറ്റിവച്ചിരിക്കുന്നത്. നോക്കാത്ത ദൂരത്ത് കണ്ണും നട്ട് എന്ന തന്‍റെ ആദ്യകാല ചിത്രത്തിലാണ് ഫാസില്‍ ആദ്യമായി അഭിനയിച്ചത്. ചിത്രത്തില്‍ മോഹന്‍ലാലിന്‍റെ സുഹൃത്തായിട്ടാണ് ഫാസില്‍ പ്രത്യക്ഷപ്പെട്ടത്. ഇനി അഭിനയിക്കാനുള്ള യാതൊരു പദ്ധതി ഇല്ലാതിരുന്നിട്ടും പൃഥ്വിരാജിന്‍റെ നിര്‍ബന്ധപൂര്‍വ്വമുള്ള ക്ഷണമാണ് തന്നെ ലൂസിഫര്‍ ചെയ്യാന്‍ പ്രേരിപ്പിച്ചതെന്നും ഫാസില്‍ പറഞ്ഞു.

മഞ്ജു വാര്യര്‍ ആണ് ലൂസിഫറിലെ നായിക. വണ്ടിപെരിയാര്‍, തിരുവനന്തപുരം, എറണാകുളം, ദുബായ്, മുംബൈ തുടങ്ങിയ സ്ഥലങ്ങളിലായാണ് ചിത്രീകരണം നടക്കുന്നത്. മുരളി ഗോപിയാണ് തിരക്കഥ ഒരുക്കിയിരിക്കുന്നത്. ആശിര്‍വാദ് സിനിമാസിന്‍റെ ബാനറില്‍ ആന്‍റണി പെരുമ്പാവൂരാണ് ചിത്രം നിര്‍മിക്കുന്നത്.