ഫേസ്ബുക്കിലൂടെ 'ഇടി' ചോർന്നു

ജയസൂര്യ നായകനായ പുതിയ ചിത്രം 'ഇടി' ഫേസ്ബുക്കിലെ ലൈവ് സ്ട്രീമിങ്ങ് വഴി ചോര്‍ന്നതായി പരാതി. ചിത്രം തിയെറ്ററിൽ എച്ച്ഡി ക്യാമറയുള്ള ഫോണിൽ ചിത്രീകരിച്ച് ലൈവ്സ്ട്രീമിങ് സംവിധാനം വഴി പ്രചരിപ്പിക്കുകയാണെന്നാണ് റിപ്പോർട്ട്.

ഗള്‍ഫ് കേന്ദ്രങ്ങളില്‍ 'ഇടി' വ്യാഴാഴ്ച റിലീസ് ചെയ്തതിന് പിന്നാലെയാണ് കാസര്‍ഗോട്ടെ ചെക്കന്‍ എന്ന ഫെയ്‌സ്ബുക്ക് പേജിലൂടെ ഇടി തീയറ്ററുകളില്‍ നിന്ന് ലൈവ് സ്ട്രീമിങ്ങിലൂടെ പ്രദര്‍ശിപ്പിച്ചത്. ചിത്രത്തിന്‍റെ നിർമാതാവ് ആന്‍റി പൈറസി സെല്ലിലും സൈബർ സെല്ലിലും പരാതി നൽകി. സംസ്ഥാനത്ത് ആദ്യമായാണ് ലൈവ് സ്ട്രീമിങ് വഴി ചിത്രം ചോർത്തുന്നത്.

ലൈവ് സ്ട്രീമിങ്ങിലൂടെ പ്രദര്‍ശിപ്പിച്ച ചിത്രം ഇരുപതിനായിരത്തിലേറെ പേര്‍ ഫേസ്ബുക്കിലൂടെ കണ്ടതായി സംവിധായകന്‍ സജിദ് യാഹിയ പറയുന്നു. ഇന്നലെ രാവിലെ പത്ത് മണിയ്ക്ക് ശേഷമാണ് ചിത്രത്തിന്റെ വീഡിയോ ഫെയ്സ്ബുക്ക് പേജില്‍ നിന്നും നീക്കം ചെയ്തത്.