ഐ. എം വിജയന്‍റെ ജീവിതം അഭ്രപാളിയിലേക്കെന്ന് റിപ്പോര്‍ട്ട്

മുൻ ഫുട്‌ബോള്‍ ക്യാപ്റ്റൻ വിപി സത്യന്‍റെ ജീവിതകഥ അഭ്രപാളിയിൽ തെളിഞ്ഞതിന് പിന്നാലെ മലയാളികളുടെ അഭിമാനമായ ഫുട്‌ബോൾ താരം ഐ.എം. വിജയൻ്റെ ജീവിതകഥയും വെള്ളിത്തിരയിലേക്ക് എത്തുന്നതായി റിപ്പോര്‍ട്ട്. ദിലീപിനെ നായകനാക്കി സൂപ്പര്‍ ഹിറ്റ് ചിത്രം രാമലീല ഒരുക്കിയ അരുണ്‍ ഗോപിയാണ് ഐഎം വിജയന്‍റെ ബയോപിക്ക് സംവിധാനം ചെയ്യുന്നതെന്നാണ് റിപ്പോര്‍ട്ടുകളിൽ പറയുന്നത്. പ്രമുഖ യുവതാരമാണ് ഐ.എം. വിജയനായി എത്തുകയെന്നും സിനിമയുടെ തിരക്കഥ ഒരുക്കുന്നതും അരുണ്‍ ഗോപി തന്നെയാണെന്നും റിപ്പോര്‍ട്ടുണ്ട്. നിവിൻ പോളി ഈ കഥാപാത്രം ചെയ്യാനുള്ള തയ്യാറെടുപ്പുകൾ നടത്തുന്നതായി റിപ്പോർട്ടുകളുണ്ടായിരുന്നു.


അരുണ്‍ ഗോപി ഇപ്പോള്‍ പ്രണവ് മോഹന്‍ലാല്‍ നായകനാകുന്ന പുതിയ സിനിമയുടെ പണിപ്പുരയിലാണ്. ഈ ചിത്രത്തിന് ശേഷമാകും ഐഎം വിജയന്‍റെ ബയോപിക്ക് ആരംഭിക്കുകയെന്നാണ് വിവരം. ചിത്രത്തിനായുള്ള പ്രാരംഭ പ്രവര്‍ത്തനങ്ങളും ലൊക്കേഷനുകൾ തേടലും വര്‍ഷങ്ങള്‍ക്ക് മുന്‍പ് തന്നെ തുടങ്ങിയിരുന്നെന്ന് അരുണ‍ ഗോപി വ്യക്തമാക്കുന്നതായും ബിഗ് ബജറ്റില്‍ ഒരുങ്ങുന്ന സിനിമയുടെ നിര്‍മാണം മലയാളത്തിലെ പ്രമുഖ നിര്‍മാണ കമ്പനിയായിരിക്കുമെന്നുമാണ് ഓൺലൈൻ മാധ്യമം റിപ്പോര്‍ട്ട് ചെയ്യുന്നത്.