ഫുട്ബോള്‍ പ്രതിഭ വി.പി സത്യന്‍റെ ജീവിതകഥ തീയേറ്ററുകളിലേക്ക്

മലയാളികളുടെ അഭിമാനമായ ഫുട്ബോള്‍ പ്രതിഭ വി.പി സത്യന്‍റെ ജീവിതകഥ തീയേറ്ററുകളിലേക്കെത്താൻ ഒരുങ്ങുന്നു. ജയസൂര്യ നായകനാകുന്ന 'ക്യാപ്റ്റന്‍' എന്ന് പേരിട്ടിരിക്കുന്ന ചിത്രം സംവിധാനം ചെയ്തിരിക്കുന്നത് പ്രജേഷ് സെൻ ആണ്. സംവിധായകൻ സിദ്ധിഖിന്‍റെ അസിസ്റ്റന്‍റായിരുന്നു പ്രജേഷ്. ജയസൂര്യ 'ക്യാപ്റ്റനെ' ഏറെ പ്രതീക്ഷയോടെയാണ് നോക്കിക്കാണുന്നത്.

ഇന്ത്യന്‍ ഫുട്ബോള്‍ ടീമിന്‍റെ ക്യാപ്റ്റനായി സത്യൻ സേവനമനുഷ്ടിച്ച കാലഘട്ടം കേരള ഫുട്ബോളിനും ഇന്ത്യന്‍ ഫുട്ബോളിനും മികച്ച കാലഘട്ടമായാണ് കണക്കാക്കുന്നത്. സത്യനാകാന്‍ വേണ്ടി ജയസൂര്യ ഫുട്ബോള്‍ പരിശീലനവും നടത്തിയിരുന്നു. അനു സിതാര നായികയാകുന്ന ക്യാപ്റ്റൻ നാല് മാസങ്ങൾക്ക് മുൻപ് തന്നെ ചിത്രീകരണം പൂര്‍ത്തിയാക്കിയിരുന്നു. ചിത്രം ഇപ്പോൾ പോസ്റ്റ് പ്രൊഡക്ഷന്‍ ഘട്ടത്തിലാണ്. ഗുഡ്‌വിൽ എന്‍റർടെയിൻമെന്‍റിന്‍റെ ബാനറിൽ ടി.എൽ. ജോർജാണ് ചിത്രം നിർമിക്കുന്നത്. പത്തു കോടി ബജറ്റിലാണ് ചിത്രം ഒരുങ്ങുന്നത്.



സിദ്ദിഖ്, രൺജി പണിക്കര്‍, നിര്‍മല്‍ പാലാഴി എന്നിവരാണ് മറ്റ് താരങ്ങള്‍. റഫീഖ് അഹമ്മദിന്‍റെ വരികൾക്ക് ഗോപിസുന്ദാണ് ഈണം പക‍ര്‍ന്നിരിക്കുന്നത്.