പ്രഥമ ജോൺ എബ്രഹാം ഷോർട്ട് ഫിലിം ഫെസ്റ്റിവൽ ഡിസംബർ 13 മുതൽ

സിനിമ എന്ന വലിയ മാധ്യമത്തിന്‍റെ ഭാഗമാകാൻ ഇറങ്ങിതിരിക്കുന്നവരിൽ ഭൂരിഭാഗവും ആദ്യമായി തങ്ങളെ സ്വയം വെളിപ്പെടുത്തുന്നത് കൂടുതലും ഹ്രസ്വചിത്രങ്ങളിലൂടെയാണ്. അതിനാൽ തന്നെ അന്താരാഷ്ട്ര തലത്തിൽ പോലും ഹ്രസ്വചിത്രങ്ങള്‍ക്ക് ഏറെ പ്രധാന്യമുണ്ട്. ഈ പ്രാധാന്യം കണക്കിലെടുത്ത് പ്രഥമ ജോൺ എബ്രഹാം ഷോര്‍ട്ട് ഫിലിം ഫെസ്റ്റിവൽ ഡിസംബർ 13, 14, 15 തീയതികളിൽ നടക്കുകയാണ്.

കോഴിക്കോട് കൃഷ്ണ മേനോൻ സ്മാരക മ്യൂസിയത്തിൽ വച്ചു നടക്കുന്ന ചലച്ചിത്രമേളയിൽ ഇന്ത്യ, ജപ്പാൻ, ഇറാൻ, സ്വിറ്റ്സര്‍ലൻഡ്, ചൈന, തുടങ്ങി 40 രാജ്യങ്ങളിൽ നിന്നായി 122 ചിത്രങ്ങളാണ് ഷോർട്ട് ഫിലിം ഫെസ്റ്റിവലിൽ മത്സരിക്കുന്നത്. ലോകമെമ്പാടുമുള്ള സിനിമ പ്രവർത്തകരുടെ ചിന്തയും ആശയങ്ങളും ഉൾപ്പെടുന്ന ഒരു മേള കൂടിയാണിത്. അതുകൊണ്ടു തന്നെ സിനിമയെ സ്നേഹിക്കുന്നവര്‍ക്ക്, പഠിക്കുന്നവർക്ക് ജോൺ എബ്രഹാം ഷോർട്ട് ഫിലിം ഫെസ്റ്റിവൽ പുതിയ തിരിച്ചറിവുകൾക്ക് വേദിയൊരുക്കും.
നടനും സംവിധായകനുമായ ജോയ് മാത്യുവാണ് ഫെസ്റ്റിവൽ ചെയര്‍മാൻ. എഴുന്നൂറിലധികം ചെറു സിനിമകളിൽ നിന്നാണ് ഡെലിഗേറ്റ്സിന് അവസാന ഘട്ട നിർണയത്തിനായി 122 സിനിമകൾ തെരഞ്ഞെടുത്തത്. ഇത്രയും രാജ്യങ്ങളെ പ്രതിനിധീകരിച്ച് സിനിമ എത്തുക എന്നത് തന്നെ സന്തോഷമുള്ള കാര്യമാണെന്നും അവരുടെ പ്രതിനിധികളും മേളയുടെ ഭാഗമാകുമെന്നും അദ്ദേഹം പറഞ്ഞു.

ഇന്ത്യയിൽ തന്നെ ഇത്തരത്തിൽ ചെറു സിനിമകൾക്കായി നടക്കുന്ന ഏറ്റവും വലിയ മേള കൂടിയാണ് കോഴിക്കോട് നടക്കാൻ പോകുന്നത്. മേളയുടെ ഡെലിഗേറ്റ് പാസ്സ് വിതരണം ആരംഭിച്ചതായി സംഘാടക സമിതി അറിയിച്ചിട്ടുണ്ട്. മേളയുടെ വെബ്സൈറ്റിലൂടെ പാസുകൾ വാങ്ങുന്നതിന് സൗകര്യം ഒരുക്കിയിട്ടുമുണ്ട്.

• Also Watch: ദിലീപ് നാദിർഷ കൂട്ടുകെട്ട് ; കേശു ഈ വീടിന്റെ നാഥൻ