'കാട് പൂക്കുന്ന നേരം' മോൺഡ്രിയൽ ചലച്ചിത്ര മേളയിലേക്ക്

പ്രശസ്ത സംവിധായകൻ ഡോ.ബിജുവിന്‍റെ ഏറ്റവും പുതിയ ചിത്രമായ 'കാട് പൂക്കുന്ന നേര'ത്തിന്‍റെ ആദ്യ പ്രദർശനം ലോക പ്രശസ്തമായ മോൺഡ്രിയൽ ചലച്ചിത്ര മേളയിൽ നടക്കും. ഈ മാസം 25 മുതൽ സെപ്റ്റംബർ 5 വരെ കാനഡയിൽ വെച്ചാണ് മോൺഡ്രിയൽ ചലച്ചിത്ര മേള നടക്കുന്നത്.നാല്പതാമത്‌ ചലച്ചിത്ര മേളയിൽ 'ഫോക്കസ് ഓൺ വേൾഡ് സിനിമ' വിഭാഗത്തിലാണ് കാട് പൂക്കുന്ന നേരം പ്രദർശിപ്പിക്കുന്നത്.

ഇന്ദ്രജിത്,റീമ കല്ലിങ്കൽ എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രത്തിൽ ഇന്ദ്രൻസ്,ഇർഷാദ്,പ്രകാശ് ബാരെ എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്.വീക്കെൻഡ് ബ്ലോക്ക് ബസ്റ്റേഴ്സിന്‍റെ ബാനറിൽ സോഫിയാ പോൾ ആണ് ചിത്രം നിർമിക്കുന്നത്.

ഈ വർഷത്തെ മോൺഡ്രിയൽ ചലച്ചിത്ര മേളയിൽ ഇന്ത്യയിൽ നിന്നും മൂന്ന് ചിത്രങ്ങളാണ് തിരഞ്ഞെടുത്തിരിക്കുന്നത്.ഫോക്കസ് ഓൺ വേൾഡ് സിനിമ വിഭാഗത്തിൽ കാട് പൂക്കുന്ന നേരത്തിനു പുറമെ സിദ്ധാർത്ഥ് ശിവയുടെ 'ചതുരം' എന്ന സിനിമയും പ്രദർശിപ്പിക്കും.മത്സര വിഭാഗത്തിൽ പ്രശസ്ത ബംഗാളി സംവിധായകൻ ഗൗതം ഘോഷിന്‍റെ 'ഷംഖാചൽ' എന്ന സിനിമയും തിരഞ്ഞെടുക്കപ്പെട്ടിട്ടുണ്ട്.

ലോകത്തെ ഏറ്റവും മികച്ച 15 ഫിലിം ഫെസ്റ്റുകളിൽ ഒന്നാണ് മോൺഡ്രിയൽ ചലച്ചിത്ര മേള.