അര്‍ജൻ്റീന ഫാൻസിൻ്റെ കഥ പറയുന്ന 'അര്‍ജൻ്റീന ഫാന്‍സ് കാട്ടൂര്‍ക്കടവ്': ടൈറ്റിൽ പോസ്റ്റര്‍

അര്‍ജൻ്റീന ഫാൻസിൻ്റെ കഥ പറയുന്ന 'അര്‍ജൻ്റീന ഫാന്‍സ് കാട്ടൂര്‍ക്കടവ്' എന്ന ചിത്രത്തിൻ്റെ ടൈറ്റിൽ പോസ്റ്റര്‍ പുറത്ത് വിട്ടു. കാളിദാസ് ജയറാമിനെ നായകനാക്കി മിഥുൻ മാനുവേൽ തോമസ് സംവിധാനം ചെയ്യുന്ന ചിത്രത്തിൽ ഐശ്വര്യ ലക്ഷ്മിയാമ് നായികയാകുന്നത്. ലോകത്തിലെ തന്നെ ഏറ്റവും കൂടുതല്‍ ആരാധകരുള്ള ഫുട്‌ബോള്‍ ടീമുകളിലൊന്നാണ് അര്‍ജൻ്റീന. ഈ ടീം ആരാധകരുടെ കഥയാണ് ചിത്രം പറയുന്നത്.

മമ്മൂട്ടിയാണ് ചിത്രത്തിൻ്റെ പോസ്റ്റർ പുറത്ത് വിട്ടത്. തൻ്റെ ഔദ്യോഗിക ഫേസ്ബുക്ക് പേജിലൂടെ താരം പോസ്റ്റർ ആരാധകർക്കായി സമർപ്പിക്കുകയായിരുന്നു. 'പുതിയതായി പുറത്തുവരാനിരിക്കുന്ന, മിഥുൻ മാനുവേൽ തോമസ് സംവിധാനം ചെയ്യുന്ന അർജൻ്റീന ഫാൻസ് കാട്ടൂർക്കടവ് എന്ന ചിത്രത്തിൻ്റെ പോസ്റ്റർ പുറത്ത് വിടാൻ കഴിഞ്ഞതിൽ സന്തോഷമുണ്ട്. ചിത്രത്തിൻ്റെ പിന്നിൽ പ്രവർത്തിക്കുന്ന എല്ലാവർക്കുംവിജയാശംസകൾ നേരുന്നു'. മമ്മൂട്ടി കുറിച്ചു



അശോകന്‍ ചെരുവിലിൻ്റെ ഇതേ പേരിലുള്ള കഥയില്‍ നിന്നും പ്രചോദനമുള്‍ക്കൊണ്ടാണ് ചിത്രം ഒരുക്കുന്നത് എന്ന് ചിത്രം പ്രഖ്യാപിച്ചപ്പോൾ തന്നെ സംവിധായകൻ വ്യക്തമാക്കിയിരുന്നു. ആഷിഖ് ഉസ്മാന്‍ ആണ് ചിത്രം നിര്‍മ്മിക്കുന്നത്. ഗോപീ സുന്ദറാണ് ചിത്രത്തിൻ്റെ സംഗീതം. രണദിവെയാണ് ക്യാമറ കൈകാര്യം ചെയ്യുന്നത്. ജോണ്‍ മന്ത്രിക്കലും മിഥുനും ചേര്‍ന്നാണ് തിരക്കഥ ഒരുക്കിയിരിക്കുന്നത്.


ആടിൻ്റെ രണ്ടാം ഭാഗത്തിന് ശേഷംമിഥുന്‍ മാനുവല്‍ പ്രഖാപിക്കുന്ന മൂന്നാം ചിത്രമാണ് അര്‍ജൻ്റീന ഫാന്‍സ്. കോട്ടയം കുഞ്ഞച്ചൻ്റെ രണ്ടാം ഭാഗവും മിഥുൻ ഒരുക്കുന്നുണ്ട്. മമ്മൂട്ടി നായകനാകുന്ന ചിത്രം ഇതിന് ശേഷമായിരിക്കും ചിത്രീകരണം ആരംഭിക്കുക. കൂടാതെ ജയസൂര്യയെ നായകനാക്കി 'ടര്‍ബോ പീറ്റര്‍' എന്നീ ചിത്രവും മിഥുന്‍ സംവിധാനം ചെയ്യും.


പൂമരത്തിന് ശേഷം കാളിദാസ് ജയറാം നായകനായി എത്തുന്ന ചിത്രമാണ് 'അര്‍ജൻ്റീന ഫാന്‍സ് കാട്ടൂര്‍ക്കടവ്'. കൂടാതെ ജീത്തു ജോസഫ് സംവിധാനം ചെയ്യുന്ന 'മിസ്റ്റർ ആൻ്റ് മിസ് റൗഡി' എന്ന ചിത്രത്തിലും കാളിദാസ് ജയറാം അഭിനയിച്ചിട്ടുണ്ട്. ഇന്നാണ് ചിത്രത്തിൻ്റെ പേരും പോസ്റ്ററും മോഷൻ പോസ്റ്ററും പുറത്തിക്കിയത്.