കാലയ്ക്ക് പ്രദര്‍ശനാനുമതി നല്‍കി കര്‍ണാടക ഹൈക്കോടതി

രജനിചിത്രം കാലയ്ക്ക് പ്രദര്‍ശനാനുമതി നല്‍കി കര്‍ണാടക ഹൈക്കോടതി. സംസ്ഥാനത്ത് കാല പ്രദര്‍ശിപ്പിക്കാന്‍ സൗകര്യമൊരുക്കണമെന്നും ചിത്രം പ്രദര്‍ശിപ്പിക്കാന്‍ മതിയായ സുരക്ഷ ഒരുക്കണമെന്നും കര്‍ണാടക ഹൈക്കോടതി സര്‍ക്കാരിനോട് നിര്‍ദേശിച്ചു.

സഞ്ജയ് ലീല ബെന്‍സാലി ചിത്രം പത്മാവതിനു നാലു സംസ്ഥാനങ്ങള്‍ ഏര്‍പ്പെടുത്തിയ വിലക്ക് നീക്കിയ സുപ്രീം കോടതി ഉത്തരവിന്‍റെ അടിസ്ഥാനത്തിലായിരുന്നു ഉത്തരവ്. കാവേരി പ്രശ്നത്തിൽ രജനീകാന്ത് കർണാടകത്തിന് എതിരായ നിലപാട് സ്വീകരിച്ചെന്നാരോപിച്ചാണ് ചിത്രത്തിനെതിരെ പ്രതിഷേധം പുകയുന്നത്.

രജനീകാന്ത് മാപ്പുപറ‍ഞ്ഞാലും ചിത്രം പ്രദര്‍ശിപ്പിക്കാന്‍ അനുവദിക്കില്ലെന്നും റിലീസ് ദിവസം വന്‍ പ്രതിഷേധ പ്രകടനം സംഘടിപ്പിക്കുമെന്നും കന്നഡ സംഘടനാ നേതാക്കൾ പ്രഖ്യാപിച്ചിരുന്നു