ഉത്തരേന്ത്യന്‍ ആരാധകര്‍ക്ക് ദുൽഖര്‍ നല്‍കിയ അപ്രതീക്ഷിത സമ്മാനം

ബോളിവുഡിൽ അരങ്ങേറ്റം കുറിച്ച മലയാളത്തിൻ്റെ യുവതാരം ദുൽഖര്‍ സൽമാന് ഉത്തരേന്ത്യയിലും ആരാധകര്‍ ഏറെയാണ്. ഈ ആരാധകര്‍ക്ക് തികച്ചും ഒരു അപ്രതീക്ഷിതമായ സമ്മാനം നൽകിയാണ് താരം ഞെട്ടിച്ചത്. സൂം ചാനൽ ഒരുക്കിയ പ്രത്യേക പ്ലാറ്റ്‍‍ഫോമിലൂടെ തെരഞ്ഞെടുക്കപ്പെട്ട ചില ദുൽഖ‍ ആരാധക‍ര്‍ക്കാണ് താരം സര്‍പ്രൈസ് സമ്മാനം ഒരുക്കിയത്.

ഇര്‍ഫാന്‍ ഖാനുമൊത്ത് അഭിനയിച്ച കര്‍വാൻ എന്ന ബോളിവുഡ് അരങ്ങേറ്റ ചിത്രത്തിലെ താരത്തിൻ്റെ പ്രകടനം ശ്രദ്ധേയമായിരുന്നു. ദുല്‍ഖറിന്‍റെ ആരാധകര്‍ക്കായി സൂം ചാനൽ ഒരുക്കിയ ഫാന്‍ഫെസ്റ്റ് മത്സരത്തില്‍ നിന്നുമാണ് ആരാധകരെ തെരഞ്ഞെടുത്തത്. ഇവര്‍ക്ക് ദുല്‍ഖറിനോടൊപ്പം സമയം ചെലവഴിക്കാന്‍ അവസരം നല്‍കുകയായിരുന്നു.


പ്രിയതാരത്തെ അടുത്ത് നേരിട്ട് കണ്ടതോടെ പലരും ആനന്ദ കണ്ണീരൊഴുക്കി, ചിലര്‍ ഞെട്ടിത്തരിച്ചിരുന്നു. മറ്റു ചിലര്‍ ആവേശത്തോടെ ദുല്‍ഖറിനൊപ്പം നൃത്തം ചെയ്തും താരത്തെ കെട്ടിപ്പിടിച്ചും സംസാരിച്ചും ഫോട്ടോയെടുത്തും ആഘോഷമാക്കി. അതിനിടെ ഒരു ആരാധികയോട് ഞാനൊന്ന് കെട്ടിപ്പിടിച്ചോട്ടെയെന്ന് താരം ചോദിച്ചപ്പോൾ വേണ്ടെന്നായിരുന്നു ആരാധികയുടെ പ്രതികരണം.