പൃഥ്വി-പാര്‍വതി-നസ്രിയ ടീമിൻ്റെ 'കൂടെ' സുപ്രിയയ്ക്ക് പറയാനുള്ളത്

പൃഥ്വിരാജ്, പാര്‍വതി, നസ്രിയ, അഞ്ജലി മേനോൻ എന്നിവര്‍ ഒന്നിക്കുന്ന പുതിയ ചിത്രം 'കൂടെ' തീയേറ്ററുകളിൽ മികച്ച അഭിപ്രായം നേടി മുന്നേറുകയാണ്. അതിനിടെ പൃഥിരാജിന്‍റെ പ്രിയതമ സുപ്രിയ പങ്കുവെച്ച ചിത്രം സോഷ്യൽ മീഡിയകളിൽ തരംഗമാകുകയാണ്. ഇരുവരുടെയും കൈകളും കൈയ്യിൽ അണിഞ്ഞിരിക്കുന്ന വിവാഹ മോതിരങ്ങളുമാണ് ചിത്രത്തിലുള്ളത്. 'കൂടെ ഇന്നും എന്നും എപ്പോഴും പൃഥ്വി' എന്നാണ് ചിത്രത്തിന് തലക്കുറിപ്പായി സുപ്രിയ കുറിച്ചിരിക്കുന്നത്. 2011ലാണ് ഇരുവരും വിവാഹിതരായത്. ഒരു മകളുണ്ട്. അലംകൃത.

മലയാളത്തിൽ ആരാധകര്‍ ഏറെ പ്രതീക്ഷയോടെ കാത്തിരുന്ന ചിത്രമാണ് 'കൂടെ'. വിവാഹ ശേഷം നസ്രിയ അഭിനയ രംഗത്തേക്ക് തിരിച്ചെത്തുന്ന ചിത്രമെന്ന പ്രത്യേകതയും 'കൂടെ'യ്ക്കുണ്ട്. അഞ്ജലി മേനോൻ ഒരുക്കുന്ന ചിത്രമെന്ന നിലയിലും ചിത്രം ശ്രദ്ധേയമായിരുന്നു. 'ബാംഗ്ലൂര്‍ ഡെയ്സി'ന് ശേഷം പാര്‍വതിയും നസ്രിയയും അഞ്ജലി മേനോനും ഒന്നിച്ച ചിത്രം കൂടിയാണ് 'കൂടെ'.