'മെക്സിക്കൻ അപാരത'യ്‍ക്കെതിരെ കെ.എസ്.യു പ്രതിഷേധം

ടൊവീനോ തോമസ് നായകനായ 'മെക്സിക്കന്‍ അപാരത'യ്ക്ക് കേരളമാകെ വന്‍ ജനസ്വീകാര്യത ലഭിച്ചുകൊണ്ടിരിക്കെ ഈ കഥയ്ക്ക് തങ്ങളുടേതായ വകഭേദമുണ്ടെന്നെ അവകാശവാദവുമായി വലതു വിദ്യാര്‍ത്ഥി സംഘടനയായ കെ.എസ്.യു. യഥാര്‍ത്ഥ കഥ കെ.എസ്.യു, എസ്‌എഫ്‌ഐക്ക് മേല്‍ നേടിയ വിജയത്തിന്റേതാണെന്നും എന്നാല്‍ സിനിമയില്‍ എത്തിയപ്പോള്‍ വിജയം എസ്‌എഫ്‌ഐയ്ക്കായെന്നും കെ.എസ്.യു ആരോപിച്ചു.



37 വര്‍ഷത്തെ എസ്‌എഫ്‌ഐ ഭരണം അവസാനിപ്പിച്ച്‌ കെ.എസ്.യു യൂണിയന്‍ ഭരണം പിടിച്ചെടുക്കുകയും അവരുടെ നേതാവ് ജിനോ ജോണ്‍ ചെയര്‍മാനാകുകയും ചെയ്തു എന്നുള്ളതാണ് വസ്തുത. എന്നാല്‍, സിനിമയിലേക്ക് കഥ എത്തിയപ്പോള്‍ വിജയിക്കുന്നതായി കാണിക്കുന്നത് എസ്‌എഫ്‌ഐയുടെ ചെയര്‍മാനാണ്.

അന്ന് കെ.എസ്.യു ചെയര്‍മാനായിരുന്ന ജിനോ ഈ ചിത്രത്തില്‍ രൂപേഷ് നേതൃത്വം കൊടുക്കുന്ന പാര്‍ട്ടിയുടെ പ്രവര്‍ത്തകനായി അഭിനയിച്ചിട്ടുമുണ്ട്. കെ.എസ്.യു, എസ്‌എഫ്‌ഐയുടെ കൊടിമരം നശിപ്പിക്കുന്നതിന്റെയും അന്നത്തെ ചെയര്‍മാന്‍ നടത്തിയ പ്രസംഗത്തിന്റെയും വീഡിയോ യൂട്യൂബില്‍ പോസ്റ്റ് ചെയ്തിട്ടുണ്ട്.

അതേസമയം സിനിമ തുടങ്ങുന്നതിന് മുന്‍പ് സംവിധായകന്‍ ടോം ഇമ്മട്ടിയും ജിനോയും കാണാന്‍ വന്നിരുന്നുവെന്നും അന്ന് പറഞ്ഞ ത്രെഡ് കെ.എസ്.യു ജയിക്കുന്നതായിരുന്നുവെന്നും കെ.എസ്.യു, ജില്ലാ സെക്രട്ടറി ടിറ്റോ ഏബ്രഹാം പറയുന്നു. എന്നാല്‍, സിനിമ ഇറങ്ങിയപ്പോള്‍ അത് എസ്‌എഫ്‌ഐക്ക് അനുകൂലമായെന്നാണ് പറഞ്ഞ് കേള്‍ക്കുന്നതെന്നും ടിറ്റോ പറഞ്ഞു. താന്‍ സിനിമ കാണാത്തതിനാല്‍ കൂടുതല്‍ പറയാനാവില്ലെന്നും ആലുവ ഉള്‍പ്പെടെയുള്ള സ്ഥലങ്ങളില്‍ കെ.എസ്.യു, സിനിമയ്ക്കെതിരെ പ്രതിഷേധ പ്രകടനങ്ങള്‍ നടത്തിയിട്ടുണ്ടെന്നും ടിറ്റോ ചൂണ്ടിക്കാട്ടി.

Ksu Protest Against Oru Mexican Aparatha Film. they says that the film script is not Stay in the righteousness of History.