'വാഷൗട്ടായിപ്പോയ നടന്മാരിൽ ഇയാളും ഉള്‍പ്പെടും'; സിനിമാക്കാരുടെ കഥ പറയാൻ 'മോഹൻ കുമാർ ഫാൻസ്'

'വിജയ് സൂപ്പറും പൗര്‍ണ്ണമിയും' എന്ന ഹിറ്റ് ചിത്രത്തിന് ശേഷം ജിസ് ജോയ് ഒരുക്കുന്ന പുതിയ ചിത്രമായ 'മോഹൻ കുമാര്‍ ഫാൻസി'ന്‍റെ ട്രെയിലര്‍ പുറത്തിറങ്ങി. കുഞ്ചാക്കോ ബോബനാണ് ചിത്രത്തിൽ നായകൻ. മലയാളത്തിൽ വീണ്ടും സിനിമയ്ക്കുള്ളിലെ സിനിമാക്കാരുടെ ജീവിതം പറയുന്നൊരു സിനിമയാണ് 'മോഹൻകുമാര്‍ ഫാൻസ്' എന്ന് ട്രെയിലർ സമര്‍ത്ഥിക്കുന്നു. കുഞ്ചാക്കോ ബോബന് പുറമെ സിദ്ധിഖ്, ആസിഫ് അലി, കെപിഎസി ലളിത, ശ്രീനിവാസന്‍, മുകേഷ്, വിനയ് ഫോര്‍ട്ട്, രമേഷ് പിഷാരടി, കൃഷ്ണശങ്കര്‍, അലൻസിയര്‍ തുടങ്ങി നിരവധി താരങ്ങള്‍ സിനിമയിൽ അണിനിരക്കുന്നുണ്ട്.

Also Read: മാസ്റ്ററിന് മാസ് വരവേല്‍പ്പ്; ആദ്യ പ്രതികരണങ്ങള്‍ ഇങ്ങനെ!

മോഹൻലാലും മമ്മൂട്ടിയുമൊക്കെ വന്ന് കളം തൂത്തുവാരിയതോടെ വാഷൗട്ടായിപ്പോയ നടന്മാരിൽ ഉള്‍പ്പെട്ട ഒരാളുടെ കഥയാണ് ചിത്രം പറയുന്നതെന്നാണ് ട്രെയിലറിലെ നരേഷനിൽ നിന്ന് ലഭിക്കുന്ന സൂചന. കുടുംബ ബന്ധങ്ങള്‍ പശ്ചാത്തലമാക്കിയുള്ളതാണ് ചിത്രം. ജിസ് ജോയ് ആദ്യമായാണ് കുഞ്ചാക്കോയെ നായകനാക്കി ഒരു സിനിമ ഒരുക്കുന്നത്. നിരവധി സൂപ്പർ ഹിറ്റ് സിനിമകളുടെ തിരക്കഥകളൊരുക്കി ശ്രദ്ധേയരായ ബോബി- സഞ്ജയ് ആണ് സിനിമയ്ക്ക് കഥ ഒരുക്കുന്നത്.

Also Read: കാത്തിരിപ്പിനൊടുവിൽ 'മാസ്റ്റര്‍' തീയേറ്ററുകളിൽ; ആവേശക്കൊടുമുടിയിൽ പ്രേക്ഷകര്‍

പുതുമുഖമായ അനാർക്കലിയാണ് ചിത്രത്തിലെ നായിക. 'കെട്ട്യോളാണ് എന്‍റെ മാലാഖ'യ്ക്ക് ശേഷം മാജിക് ഫ്രെയിംസിന്‍റെ ബാനറില്‍ ലിസ്റ്റിന്‍ സ്റ്റീഫന്‍ ആണ് ഈ ചിത്രം നിര്‍മിക്കുന്നത്. ജിസ് ജോയ്‍യുടെ ആദ്യ മൂന്ന് ചിത്രങ്ങളിലും ആസിഫ് അലി തന്നെയായിരുന്നു നായകനായിരുന്നത്. 2013ല്‍ പ്രദര്‍ശനത്തിനെത്തിയ ബൈസിക്കിള്‍ തീവ്‌സ് എന്ന ചിത്രമാണ് ജിസ് ആദ്യമായി സംവിധാനം ചെയ്തത്. ശേഷം സണ്‍ഡേ ഹോളിഡേ, വിജയ് സൂപ്പറും പൗർണ്ണമിയും എന്നീ സിനിമകളും ഒരുക്കുകയുണ്ടായി.

Also Watch: