എനിക്ക് ബോധിപ്പിക്കേണ്ടത് മഞ്ജുവിനെ മാത്രം: കുഞ്ചാക്കോ ബോബൻ

ദിലീപ്-കാവ്യ ദമ്പതികൾക്ക് വിവാഹാശംസകൾ നേർന്നത്തിന്‍റെ പേരിൽ വിമർശനം നേരിടേണ്ടി വന്നതിന് മറുപടിയുമായി കുഞ്ചാക്കോ ബോബൻ.

കാവ്യക്കും ദിലീപിനും ആശംസകൾ നേർന്ന് കൊണ്ടുള്ള തന്‍റെ പോസ്റ്റിനെ ഒരു കൂട്ടം ആൾകാർ തെറ്റായി വ്യാഖ്യാനിച്ചതിൽ വിഷമമുണ്ട്. മഞ്ജുവും കാവ്യയും ദിലീപുമെല്ലാം തന്റെയും തന്റെ വീട്ടുകാരുടെയും കൂട്ടുകാരാണ്.

മഞ്ജുവിന്‍റെ രണ്ടാമത്തെ തിരിച്ചു വരവിൽ ഞാൻ എങ്ങിനെയാണ് മഞ്ജുവിനൊപ്പം നിന്നതെന്ന് മഞ്ജുവിന് അറിയാം. ആളുകൾക്ക് എന്തും പറയാം എന്നാൽ അത് ചെയ്തുകാണിക്കുക എന്നത് അൽപം ധൈര്യം ആവശ്യമുള്ള കാര്യമാണ്.

ഞാൻ ചെയ്തതിന് എനിക്ക് മഞ്ജുവിന്‍റെ മുൻപിൽ മാത്രമേ ഉത്തരം പറയേണ്ട കാര്യമുള്ളൂ. കാവ്യയെ വർഷങ്ങളായി അറിയാം, ഒരു സഹോദരിയെ പോലെയോ കൂട്ടുകാരിയെ പോലെയോ ആണ് കാവ്യ. ദിലീപും അങ്ങനെ തന്നെ. അതിനാലാണ് ഇരുവരെയും താൻ അഭിനന്ദിച്ചത്. ഞാൻ ഇതുവരെ ആരുടേയും സ്വകാര്യ ജീവിതത്തെ കുറിച്ച് ചോദിച്ചിട്ടില്ല എന്നെല്ലാമാണ് കുഞ്ചാക്കോ ബോബൻ തന്‍റെ മറുപടി പോസ്റ്റിൽ കുറിച്ചിരിക്കുന്നത്.

മഞ്ജുചേച്ചിയുടെ കണ്ണുനീര് വീണ് നനഞ്ഞ ജീവിതത്തിന് മനസറിഞ്ഞ് ആശംസകള്‍ നേരാന്‍ നിങ്ങള്‍ക്കെങ്ങനെ കഴിയുന്നു എന്നായിരുന്നു കുഞ്ചാക്കോ ബോബനോട് ആരാധകരുടെ ചോദ്യം. ആശംസകൾ നേരം നിങ്ങൾക്ക് കഴിയുമെങ്കിലും കേരളത്തിലെ അമ്മമാർക്കും സഹോദരിമാർക്കും കഴിയില്ലേ എന്ന രീതിയിലുള്ള കമന്റുകളാണ് താരത്തിന്റെ പോസ്റ്റിനു താഴെ വന്നത്.