പൃഥ്വിയുടെ ബ്രഹ്മാണ്ഡ ചിത്രം 'കാളിയൻ' ഇതാ ഇവിടെ വരെ; പുതിയ വിശേഷം പങ്കുവെച്ച് അണിയറക്കാര്‍!

പൃഥ്വിരാജ് നായകനാകുന്ന ബ്രഹ്മാണ്ഢ ചിത്രം കാളിയന് തുടക്കമായതായി അണിയറപ്രവര്‍ത്തകര്‍. ചിത്രത്തിൻ്റെ ഷൂട്ടിങ്ങുമായി ബന്ധപ്പെട്ട പ്രാരംഭഘട്ട പ്രവര്‍ത്തനങ്ങൾ തുടങ്ങിയതായി അണിയറപ്രവര്‍ത്തകര്‍ ചിത്രത്തിൻ്റെ ഔദ്യോഗിക ഫേസ്ബുക്ക് പേജിലൂടെ അറിയിച്ചു. കാളിയന്റെ പിന്നണി പ്രവർത്തകർക്കൊപ്പം പൃഥ്വിരാജ് പകര്‍ത്തിയ ചിത്രം പങ്കുവെച്ചുകൊണ്ടാണ് പുതിയ വിശേഷം ആരാധകരെ അറിയിച്ചിരിക്കുന്നത്. കാളിയന് തുടക്കമായെന്നും കാസ്റ്റിങ് കോളിനും മറ്റ് വിവരങ്ങൾക്കുമായി കാത്തിരിക്കൂ എന്നാണ് ചിത്രത്തോടൊപ്പം കുറിച്ചിട്ടുള്ളത്.

Also Read: റാംപിൽ കൈകോർ‍ത്ത് കരീനയും കാർത്തികും; വൈറലായി ചിത്രങ്ങൾ

ഈ വര്ഷം തന്നെ ചിത്രം തുടങ്ങാനാണ് പദ്ധതിയിട്ടിരിക്കുന്നതെന്നാണ് അറിയാൻ കഴിയുന്ന വിവരം. ബ്ലെസി സംവിധാനം ചെയ്യുന്ന ആടുജീവിതത്തിലെ നജീബാകാനുള്ള തയ്യാറെടുപ്പിലാണ് പൃഥ്വിരാജ് ഇപ്പോൾ. മാര്‍ച്ച് മാസം അവസാനത്തോടെയാണ് ഈ ചിത്രത്തിൻ്റെ അവസാന ഷെഡ്യൂളിന് തുടക്കമാകുക. ഏഴു മാസത്തോളമാണ് ഈ ചിത്രത്തിനായി താരം മാറ്റി വെച്ചിട്ടുള്ളത്. അതിന് ശേഷമായിരിക്കാം കാളിയൻ തുടങ്ങുക എന്നാണ് സോഷ്യൽ ലോകം അനുമാനിക്കുന്നത്. കാളിയന്റെ അണിയറ പ്രവർത്തകര്‍ പൃഥ്വിരാജുമായി കഴിഞ്ഞ ദിവസം അവസാനഘട്ട ചർച്ച നടന്നിരുന്നെന്നും ചിത്രം അതാണ് വ്യക്തമാക്കുന്നതെന്നുമാണ് ആരാധകരുടെ പക്ഷം.



കാളിയന്റെ ചിത്രീകരണത്തിന് തുടക്കമാകുന്നത് 2020 ഒക്ടോബർ മാസത്തിലാണെന്നും റിപ്പോര്‍ട്ടുകളുണ്ട്. ബ്രഹ്‌മാണ്ഡ ചിത്രമായി ഒരുക്കുന്ന ചിത്രത്തിന്റെ അവസാനഘട്ട പ്രീ പ്രൊഡക്ഷൻ വർക്കുകൾ ഇപ്പോൾ കൊച്ചിയിൽ പുരോഗമിക്കുകയാണ്. ഉടൻ തന്നെ കാസ്റ്റിംഗ് കാൾ പ്രഖ്യാപനം ഉണ്ടാകുമെന്നും അണിയറ പ്രവര്‍ത്തകര്‍ വ്യക്തമാക്കിയിട്ടുണ്ട്.

Also Read: പൃഥ്വിരാജിനേയും ബിജുമേനോനെയും അറിയാത്ത നഞ്ചമ്മ പാടിയ നാടൻപാട്ട് വൈറൽ

നവാഗതനായ എസ്‌ മഹേഷ്‌ ആണ് കാളിയൻ സംവിധാനം ചെയ്യുന്നത്‌. മാജിക്ക്‌ മൂൺസ്‌ പ്രൊഡക്ഷൻസിന്റെ ബാനറിൽ രാജീവ്‌ ഗോവിന്ദനാണ് നിർമ്മാണം. സുജിത്‌ വാസുദേവ്‌ ആണ് ചിത്രത്തിന്റെ ഛായാഗ്രഹണം നിർവഹിക്കുന്നത്‌. ബി.ടി അനിൽ കുമാറാണ് തിരക്കഥ. കമ്മാര സംഭവം എന്ന ചിത്രത്തിലൂടെ ദേശീയ അവാർഡ്‌ കരസ്ഥമാക്കിയ ബംഗ്ലൻ ചിത്രത്തിന്റെ ആർട്ട്‌ വർക്കുകൾ ഒരുക്കും. ലൂസിഫറിന് വേണ്ടി വസ്ത്രാലങ്കാരം നിർവഹിച്ച സുജിത്താണ് ഈ ചിത്രത്തിന് വേണ്ടി കോസ്റ്റ്യൂം ഡിസൈൻ ചെയ്യുന്നത്‌.