'കരിന്തണ്ടനായി' വിനായകന്‍ ; ഫസ്റ്റ്‌ലുക്ക് പോസ്റ്റര്‍

ആദിവാസികള്‍ക്കിടയിൽ നിന്നുള്ള പേരുകേട്ട സംവിധായിക ലീല സന്തോഷ് സംവിധാനം ചെയ്യുന്ന ചിത്രം 'കരിന്തണ്ടന്‍' ഫസ്റ്റ്‌ലുക്ക് പോസ്റ്റര്‍ പുറത്ത്. താമരശ്ശേരി ചുരത്തിന്റെ പിതാവായ കരിന്തണ്ടന്‍ എന്ന ആദിവാസി മൂപ്പന്റെയും ജീവിതമാണ് ചിത്രം പറയുന്നത്. നടൻ വിനായകനാണ് ചിത്രത്തില്‍ കരിന്തണ്ടന്റെ വേഷത്തിലെത്തുന്നത്.

''ബ്രിട്ടൂഷുകാര് വയനാട്ടിലേക്ക് വന്ത കാലത്ത് അവരക്കു മലെമ്പെകേറുവുള എളുപ്പ വയി കാട്ടികൊടുത്ത കരിന്തണ്ടന വഞ്ചകെത'' എന്ന ചേറു വിശേഷണമാണ് ഫസ്റ്റ്ലുക്ക് പോസ്റ്ററിൽ കരിന്തണ്ടനെകുറിച്ച് പറഞ്ഞിരിക്കുന്നത്. കേട്ട കഥകളുടെ അടിസ്ഥാനത്തില്‍ 1750 മുതല്‍ 1799 വരെയുള്ള കാലഘട്ടത്തിലാണ് കരിന്തണ്ടന്‍ ജീവിച്ചിരുന്നതായി കരുതപ്പെടുന്നത്.

വയനാടന്‍ അടിവാത്തുള്ള ചിപ്പിലിത്തോട് ഭാഗത്ത് പണിയയെന്ന ആദിവാസി വിഭാഗത്തിന്റെ തലവനായിരുന്നു കരിന്തണ്ടന്‍. രാജീവ് രവി, ബി അജിത്ത്കുമാര്‍, മധു നീലകണ്ഠന്‍ എന്നിവരുടെ നേതൃത്വത്തിലുള്ള കളക്ടീവ് ഫേസ് വണ്ണാണ് ചിത്രം നിർമ്മിക്കുന്നത്. നിഴലുകള്‍ നഷ്ടപ്പെട്ട ഗോത്രഭൂമി’ എന്ന പേരില്‍ ഡോക്യുമെന്ററി ചിത്രം സംവിധാനം ചെയ്തു കൊണ്ടാണ് ലീല സിനിമാ രംഗത്തേക്കു കടന്നു വന്നത്.