സിനിമാസമരം കീര്‍ത്തി സുരേഷിന് വേണ്ടിയെന്ന് ലിബര്‍ട്ടി ബഷീര്‍

സിനിമാ സമരം തുടരുന്നതിന് കാരണം ചില സംഘടനാ നേതാക്കളുടെ വ്യക്തിതാല്‍പ്പര്യമാണെന്ന് ലിബര്‍ട്ടി ബഷീര്‍ ആരോപിച്ചു. ഫിലിം പ്രൊഡ്യൂസേഴ്‌സ് അസോസിയേഷന്‍ പ്രസിഡന്റ് ജി സുരേഷ്‌കുമാര്‍ മകളുടെ സിനിമയ്ക്ക് വേണ്ടിയാണ് സമരം അവസാനിപ്പിക്കാത്തതെന്ന് ബഷീർ തുറന്നടിച്ചു. സുരേഷ് കുമാറിന്റെ മകളുടെ പുതിയ തമിഴ് ചിത്രം ജനുവരി പകുതിയോടെ റിലീസ് ചെയ്യുകയാണ്. വിജയ് നായകനാകുന്ന ഭൈരവാ എന്ന ചിത്രത്തിലെ നായികയാണ് കീര്‍ത്തി സുരേഷ്. ഈ സിനിമയ്ക്ക് കേരളത്തില്‍ 75 തിയറ്ററുകളാണ് നിലവില്‍ ലഭിച്ചതെന്നും മലയാള സിനിമാ റിലീസ് ഇനിയും വൈകിയാല്‍ 200 ലേറെ തിയറ്ററുകള്‍ ലഭിക്കുമെന്നതിനാലാണ് സമരം തുടരുന്നതെന്നും ലിബര്‍ട്ടി ബഷീര്‍ ആരോപിക്കുന്നു.

സ്വന്തം താല്‍പ്പര്യത്തിന് വേണ്ടി സുരേഷ്‌കുമാര്‍ സംഘടനയെ വഞ്ചിക്കുകയാണ്. നിര്‍മ്മാതാക്കളുടെയും വിതരണക്കാരുടെയും സംഘടനയിലെ അംഗങ്ങളായ പലരും തിയറ്ററുടമകളുടെ വ്യവസ്ഥ അംഗീകരിച്ച് സിനിമ റിലീസ് ചെയ്യാന്‍ തയ്യാറാണെന്നും ലിബര്‍ട്ടി ബഷീര്‍. 10 കോടിക്ക് മുകളില്‍ നഷ്ടമാണ് സിനിമാ സമരം മൂലം ചലച്ചിത്ര വ്യവസായത്തിന് ഉണ്ടായത്.


ജനുവരിയിലേക്കും സിനിമാ സമരം നീളുന്ന സാഹചര്യമുണ്ടായാല്‍ രൂക്ഷമായ പ്രതിസന്ധിയാണ് മലയാള ചലച്ചിത്രലോകത്തെ കാത്തിരിക്കുന്നത്. ജനുവരി അവസാനത്തോടെ തിയറ്ററുകളിലെത്തുന്ന ഇതരഭാഷാ റിലീസുകളുമായി മുന്നോട്ട് പോകാനാണ് തിയറ്ററുടമകൾ ഇപ്പോൾ തീരുമാനിച്ചിരിക്കുന്നത്.

liberty basheer against g sureshkumar.