വെയില്‍ മരങ്ങള്‍
കേരളത്തിലേക്ക് രാജ്യാന്തര പുരസ്കാരം എത്തിച്ച ചിത്രമാണ് വെയില്‍ മരങ്ങള്‍. ഷാങ്ഹായ് രാജ്യാന്തര ചലച്ചിത്രമേളയില്‍ ഡോക്ടര്‍ ബിജു സംവിധാനം ചെയ്ത ചിത്രത്തിലെ അഭിനയത്തിന് ഇന്ദ്രന്‍സിന് മികച്ച നടനുള്ള പുരസ്കാരം ലഭിച്ചു. ഔട്ട്സ്റ്റാന്‍റിങ് ആര്‍ട്ടിസ്റ്റിക് അച്ചീവ്മെന്‍റ് അവാര്‍ഡും വെയില്‍ മരങ്ങള്‍ നേടി. പിന്നാലെ കേരള രാജ്യാന്തര ചലച്ചിത്രമേളയില്‍ മികച്ച മലയാളം ചിത്രത്തിനുള്ള നെറ്റ്പാക് പുരസ്കാരം ഡോക്ടര്‍ ബിജു ചിത്രം സ്വന്തമാക്കി.
മൂത്തോന്
2019 ല്‍ മലയാളം ഏറ്റവും കൂടുതല്‍ കാത്തിരുന്ന സിനിമകളില്‍ ഒന്നായിരുന്നു മൂത്തോന്. ദേശീയ പുരസ്കാര ജേതാവായ ഗീതു മോഹന്‍ദാസിന്‍റെ രണ്ടാമത്തെ ചിത്രമെന്ന നിലയിലും നിവിന്‍ പോളിയുടെ വ്യത്യസ്ത കഥാപാത്രവുമായെത്തുന്ന ചിത്രമെന്ന നിലയിലും ഏറെ പ്രതീക്ഷകളുണ്ടായിരുന്നു മൂത്തോന്. ടൊറന്‍റോ രാജ്യാന്തര ചലച്ചിത്രമേളയിലായിരുന്നു മൂത്തോന്‍റെ ആദ്യ പ്രദര്‍ശനം. മികച്ച പ്രതികരണമാണ് മേളയില്‍ ചിത്രം കണ്ടവരില്‍ നിന്നും ലഭിച്ചു. ആ പ്രതികരണങ്ങള്‍ ചിത്രം തിയേറ്ററുകളിലെത്തിയപ്പോഴും ലഭിച്ചു. നിവിന്‍ പോളിയുടെ കരിയറിലെ ഏറ്റവും മികച്ച പ്രകടനമെന്നാണ് മൂത്തോനിലെ അഭിനയം വിലയിരുത്തപ്പെടുന്നത്.
ജല്ലിക്കട്ട്
ലിജോ ജോസ് പെല്ലിശ്ശേരി എന്ന ഡയറക്ടറുടെ പേരുമാത്രം മതി ഇന്ന് സിനിമയ്ക്ക് മുന്നില്‍ ആളെ എത്തിക്കാന്‍. ലിജോയുടെ സിനിമയായ ജല്ലിക്കട്ടിനായി ആരാധകര്‍ കാത്തിരിക്കുകയായിരുന്നു. ആന്‍റണി വര്‍ഗ്ഗീസ്, ചെമ്പന്‍ വിനോദ്, സാബുമോന്‍ തുടങ്ങിയവരായിരുന്നു ചിത്രത്തിലെ പ്രധാന അഭിനേതാക്കള്‍. ടൊറന്‍റോ രാജ്യാന്തര ചലച്ചിത്രമേളയിലായിരുന്നു ജല്ലിക്കട്ടിന്‍റെ പ്രീമിയര്‍. ഫെസ്റ്റിവലില്‍ മികച്ച പ്രതികരണമായിരുന്നു ചിത്രത്തിന് ലഭിച്ചത്. നിരൂപകരും ചിത്രത്തെ പ്രശംസിച്ചു. ഇതോടെ ചിത്രം കാണാനുള്ള പ്രേക്ഷകരുടെ പ്രതീക്ഷയും വര്‍ധിച്ചു. കേരളത്തില്‍ റിലീസ് ചെയ്തപ്പോഴും മികച്ച പ്രതികരണങ്ങളായിരുന്നു ചിത്രത്തിന് ലഭിച്ചത്.
ചോല
ഫെസ്റ്റിവലുകളിലെ സ്ഥിരം സാന്നിധ്യമായ സനല്‍ കുമാര്‍ ശശിധരന്‍റെ ഏറ്റവും പുതിയ ചിത്രമായ ചോല പല ഫെസ്റ്റിവലിലും മികച്ച പ്രതികരണം നേടിയ ശേഷമാണ് തിയേറ്ററുകളിലെത്തിയത്. നിമിഷ സജയനും ജോജു ജോര്‍ജിനും മികച്ച നടിയ്ക്കും നടനുമുള്ള സംസ്ഥാന ചലച്ചിത്ര പുരസ്കാരം നേടി കൊടുത്ത ചിത്രമാണ് ചോല. വെനീസ് രാജ്യാന്തര ചലച്ചിത്രമേള, ജനീവ രാജ്യാന്തര ചലച്ചിത്രമേള, ടോക്കിയോ ചലച്ചിത്രമേള എന്നിവിടങ്ങളില്‍ നിന്നും മികച്ച പ്രതികരണങ്ങള്‍ നേടിയ ചിത്രമാണ് ചേല. തിയറ്റര്‍ റിലീസിലും ചിത്രം ഓളങ്ങളുണ്ടാക്കി.
സുഡാനി ഫ്രം നെെജീരിയ
സക്കറിയ മുഹമ്മദിന്‍റെ അരങ്ങേറ്റ ചിത്രം 2018 ലായിരുന്നു തിയേറ്ററിലെത്തിയത്. നിരൂപക പ്രശംസയും പ്രേക്ഷകരുടെ കെെയ്യടിയും ഒരുപോലെ നേടിയ ചിത്രമാണ് സുഡാനി ഫ്രം നെെജീരിയ. റഷ്യയിലെ ടെെം രാജ്യാന്തര ചലച്ചിത്രമേളയിലാണ് സുഡാനി ഫ്രം നെെജീരിയ തിളങ്ങിയത്. മേളയില്‍ ഓഡിയന്‍സ് ചോയ്സ് പുരസ്കാരമായിരുന്നു സുഡാനി ഫ്രം നെെജീരിയ നേടിയത്.
ഉയരെ
പാര്‍വ്വതിയുടെ ശക്തമായ സ്ത്രീ കഥാപാത്രവുമായെത്തിയ ഉയരെ 2019 ലെ മികച്ച സിനിമകളിലൊന്നാണ്. ചിത്രത്തിന് രാജ്യത്തിന്‍റെ ശ്രദ്ധ നേടാനായിരുന്നു. നവാഗതനായ മനു അശോകനായിരുന്നു ചിത്രം സംവിധാനം ചെയ്തത്. 50-ാമത് ഇന്ത്യന്‍ രാജ്യാന്തര ചലച്ചിത്രമേളയില്‍ മികച്ച നവാഗത സംവിധായകനുള്ള നാമനിര്‍ദ്ദേശം ഉയരെയിലൂടെ മനു നേടിയിരുന്നു. ചിത്രം ബോസ്റ്റണ്‍ രാജ്യാന്തര ചലച്ചിത്രമേളയിലും പ്രദര്‍ശിപ്പിക്കുകയുണ്ടായി.