'ചാലക്കുടിക്കാരന്‍ ചങ്ങാതി'യുടെ ട്രെയിലര്‍ വൈറലാകുന്നു

അന്തരിച്ച അതുല്യ നടൻ കലാഭവൻ മണിയുടെ ജീവചരിത്രം പറയുന്ന ചിത്രം 'ചാലക്കുടിക്കാരന്‍ ചങ്ങാതി'യുടെ ട്രെയിലര്‍ വൈറലാകുന്നു. തെങ്ങുകയറ്റ തൊഴിലാളിയിൽ നിന്നും സൂപ്പര്‍സ്റ്റാര്‍ പദവിയിൽ എത്തിയ താരത്തിൻ്റെ ജീവിതത്തിലെ സംഭവവികാസങ്ങൾ കൃത്യമായി വരച്ചുകാട്ടുകയാണ് ചിത്രത്തിലൂടെ. കലാഭവൻ മണിയുടെ രൂപവും ഭാവവും ആവാഹിച്ചാണ് ചിത്രത്തിലെ നായകൻ രാജമണി എത്തുന്നത്. ഒരുലക്ഷത്തിനു മുകളിൽ ആളുകളാണ് ചിത്രത്തിൻ്റെ ട്രെയിലർ ഇതുവരെ കണ്ടിരിക്കുന്നത്. വിനയൻ ആണ് ചിത്രം സംവിധാനം ചെയ്യുന്നത്. ഹണിറോസും പുതുമുഖം നിഹാരികയുമാണ് ചിത്രത്തിലെ നായികമാർ. മികച്ച പ്രതികരണമാണ് ട്രെയിലറിന് ലഭിക്കുന്നത്.

ഹൃദയഹാരിയായ കമൻ്റുകളാണ് മണി ആരാധകര്‍ ട്രെയിലര്‍ കണ്ട് യൂട്യൂബിൽ കുറിക്കുന്നത്. അല്‍ഫാ ഫിലിംസിൻ്റെ ബാനറില്‍ ഗ്ലാസ്റ്റണ്‍ യേശുദാസ് ആണ് ചിത്രം നിര്‍മിക്കുന്നത്. ഹരിനാരായണൻ്റെ വരികള്‍ക്ക് ബിജിബാല്‍ ആണ് ഈണം പകരുന്നത്. ചിത്രത്തിന് തിരക്കഥയും സംഭാഷണവും ഒരുക്കിയിരിക്കുന്നത് ഉമ്മര്‍ കാരിക്കാടാണ്.



സലിംകുമാര്‍, ജനാര്‍ദനന്‍, ശിവജി ഗുരുവായൂര്‍, കോട്ടയം നസീര്‍, ധര്‍മ്മജന്‍, വിഷ്ണു, ജോജു ജോര്‍ജ്ജ്, ടിനിടോം എന്നിവരാണ് ചിത്രത്തിലെ മുഖ്യ താരങ്ങൾ. ഇവരെ കൂടാതെ കൊച്ചുപ്രേമന്‍, ശ്രീകുമാര്‍, കലാഭവന്‍ സിനോജ്, ജയന്‍, രാജാസാഹിബ്, ചാലി പാലാ, സാജുകൊടിയന്‍, കെ.എസ്. പ്രസാദ്, കലാഭവന്‍ റഹ്മാന്‍, ആദിനാട് ശശി, പൊന്നമ്മബാബു എന്നിവരും ചിത്രത്തിലുണ്ട്.