'ദളപതി'യ്ക്ക് ശേഷം മെഗാസ്റ്റാറും സ്റ്റെൽ മന്നനും വീണ്ടും ഒന്നിക്കുന്നു

'ദളപതി'യ്ക്ക് ശേഷം മെഗാസ്റ്റാറും സ്റ്റെൽ മന്നനും വീണ്ടും ഒന്നിക്കുന്നെന്ന് റിപ്പോര്‍ട്ട്. റിപ്പോര്‍ട്ടുകൾ കൃത്യമാണെങ്കിൽ 26 വര്‍ഷങ്ങള്‍ക്ക് ശേഷമാണ് ഇരുവരും ഒരു സിനിമയ്ക്കായി ഒന്നിക്കുന്നത്. എന്നാൽ തമിഴ് ചിത്രമോ മലയാള ചത്രമോ അല്ല ഇവരുടെ വെള്ളിത്തിരയിലെ പുനഃസമാഗമത്തിന് വേദിയൊരുക്കുന്നത് എന്നതാണ് ശ്രദ്ധേയം. മറാത്തി ചിത്രമായ ‘പസായദന്‍’ എന്ന് പേരിട്ട ചിത്രത്തിലൂടെ ഇരുവരും മറാത്തിയില്‍ അരങ്ങേറ്റം നടത്തുമെന്ന് മിറര്‍ ഓണ്‍ലൈൻ റിപ്പോര്‍ട്ട് ചെയ്യുന്നു.

48ാമത് അന്താരാഷ്ട്ര ഫിലിം ഫെസ്റ്റിവലിലേക്ക് തെരഞ്ഞെടുക്കപ്പെട്ട ‘ഇടക്’ എന്ന മറാത്തി ചിത്രത്തിന്‍റെ സഹ- എഴുത്തുകാരൻ കൂടിയായ നവാഗതനായ ദീപക് ഭാവെ ആണ് ചിത്രം സംവിധാനം ചെയ്യുന്നത്. 26 വര്‍ഷങ്ങൾക്ക് മുമ്പ് മണിരത്‌നം സംവിധാനം ചെയ്ത ദളപതി എന്ന ചിത്രത്തിനായാണ് മമ്മൂട്ടിയും രജനീകാന്തും ഒന്നിച്ചത്. രജനികാന്തിനെ നായകനാക്കി പാരഞ്ജിത് സംവിധാനം ചെയ്യുന്ന അടുത്ത തമിഴ് ചിത്രമായ ‘കാല’യില്‍ മമ്മൂട്ടി അംബേദ്കറായി അഭിനയിച്ചേക്കുമെന്നും റിപ്പോര്‍ട്ടുണ്ട്. ഈ ചിത്രത്തില്‍ രജനി ഒരു അധോലോക നേതാവായാണ് അഭിനയിക്കുക.