മമ്മൂട്ടി 'പരോളി'ലിറങ്ങുന്നു; ആകാംക്ഷയോടെ ആരാധകര്‍

മമ്മൂട്ടിയുടെ പുതിയ ചിത്രത്തിന്‍റെ ഫസ്റ്റ്‍‍ലുക്ക് പോസ്റ്റര്‍ തരംഗമാകുന്നു. കഴിഞ്ഞദിവസമാണ് മമ്മൂട്ടിയെ നായകനാക്കി ശരത് സന്‍ദിത് ഒരുക്കുന്ന പരോൾ എന്ന ചിത്രം പ്രഖ്യാപിച്ചത്. ഇന്ന് വൈകിട്ട് ഫസ്റ്റ്‍‍ലുക്ക് പോസ്റ്റര്‍ പുറത്തിറക്കുമെന്നായിരുന്നു അറിയിച്ചിരുന്നതെങ്കിലും ഇന്ന് രാവിലെ മുതൽ തന്നെ ചിത്രത്തിന്‍റെ ഫസ്റ്റ്‍‍ലുക്ക് പോസ്റ്റര്‍ പ്രചരിക്കുകയാണ്. ഫേസ്ബുക്കിലും ട്വിറ്ററിലും ഞൊടിയിടയിലാണ് പോസ്റ്റര്‍ തരംഗമായിരിക്കുന്നത്. മമ്മൂട്ടി തടവുകാരനായെത്തുന്നെന്ന് കരുതുന്ന ഈ ചിത്രത്തിൽ ഇനിയയാണ് നായിക. മമ്മൂട്ടിയുടെ സഹോദരിയുടെ വേഷത്തില്‍ മിയയും എത്തുന്നുണ്ട്.


.@mammukka ‘s upcoming movie #Parole first look poster !! pic.twitter.com/T2kaFFMtGb — Kerala Producers (@KeralaProducers) January 13, 2018
ചിത്രത്തിന്‍റെ പോസ്റ്റര്‍ ഇന്ന് വൈകിട്ട് അഞ്ചു മണിക്ക് ഔദ്യോഗികമായി റിലീസ് ചെയ്യുമെന്നാണ് മമ്മൂട്ടി ഇന്നലെ അറിയിച്ചിരുന്നത്. എന്നാൽ ഇപ്പോൾ പുറത്തെത്തിയിരിക്കുന്ന ഫസ്റ്റ്‍‍ലുക്ക് പോസ്റ്റര്‍ തന്നെയാണോ ഔദ്യോഗിക ഫസ്റ്റ്‍‍ലുക്ക്‌ പോസ്റ്റര്‍ എന്ന് വിവരം സ്ഥിരീകരിക്കാൻ വൈകിട്ടേ കഴിയുകയുള്ളൂ. ചിത്രം ഒരു സ്റ്റൈലിഷ് ത്രില്ലര്‍ ആയിരിക്കുമെന്നാണ് ലഭിക്കുന്ന സൂചന. അജിത് പൂജപ്പുരയാണ് ചിത്രത്തിന് തിരക്കഥ ഒരുക്കിയിരിക്കുന്നത്. ഒരു യഥാര്‍ത്ഥ സംഭവത്തില്‍ നിന്നുണ്ടായ കഥയാണ് പരോളിനായി ഉപയോഗിച്ചിരിക്കുന്നതെന്നും റിപ്പോര്‍ട്ടുകളുണ്ട്. കേരളത്തിലും ബെംഗലൂരുവിലും രണ്ടു ഷെഡ്യൂളിലായാണ് സിനിമയുടെ ചിത്രീകരണം പൂര്‍ത്തിയാക്കിയിരിക്കുന്നത്. ബാഹുബലിയിലെ കാലകേയനെ അവതരിപ്പിച്ച തെലുങ്കു നടന്‍ പ്രഭാകറും സിദ്ധിഖ്, സുരാജ് വെഞ്ഞാറമ്മൂട് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.