'പേരന്‍പി'ലെ പുതിയ പ്രമോ വീഡിയോ ശ്രദ്ധേയമാകുന്നു

മമ്മൂട്ടി വിസ്മയ പ്രകടനം കാഴ്ച വെക്കുന്ന 'പേരൻപി'ൻ്റെ പുതിയ പ്രൊമോ വീഡിയോ പുറത്തുവന്നു. ദേശീയ പുരസ്കാര ജേതാവ് റാമിൻ്റെ സംവിധാനത്തിൽ ഒരുങ്ങുന്ന ചിത്രം ഫെബ്രുവരി 1ന് തീയേറ്ററുകളിലെത്തും. ജനുവരി 31ന് ദുബായിൽ ചിത്രത്തിൻ്റെ പ്രീമിയ‍ർ ഷോ ഉണ്ടാകും. സ്പാസ്റ്റിക് പരാലിസിസ് എന്ന രോഗാവസ്ഥയിലൂടെ കടന്നു പോകുന്ന പെൺകുട്ടിയും അവളുടെ പിതാവും തമ്മിലുള്ള ആത്മബന്ധത്തിൻ്റെ കഥയാണ് ചിത്രം പറയുന്നത്.

ചിത്രത്തിൽ അമുദൻ എന്ന കഥാപാത്രമായി മമ്മൂട്ടി അവിസ്മരണീയ അഭിനയമാണ് കാഴ്ച വെക്കുന്നത്. പേരൻപ് നിരവധി അന്തരാഷ്ട്ര ചലച്ചിത്രമേളകളിൽ പ്രദ‍ർശിപ്പിച്ചിരുന്നു. തങ്കമീൻകൾ, തരമണി തുടങ്ങിയ ചിത്രങ്ങളിലൂടെ ശ്രദ്ധേയനാണ് സംവിധായകൻ റാം. തങ്കമീൻകളിൽ അഭിനയിച്ച സാധനയാണ് മമ്മൂട്ടിയുടെ മകളായി എത്തുന്നത്. ഒരിടവേളയ്ക്ക് ശേഷം മമ്മൂട്ടി തമിഴിലേക്കെത്തുന്ന ചിത്രമെന്ന പ്രത്യേകതയും 'പേരൻപി'നുണ്ട്.


ഗോവൻ ചലച്ചിത്ര മേളയിൽ പ്രദർശിപ്പിച്ചപ്പോൾ മുതൽ അഭിനന്ദന പ്രവാഹ മായിരുന്നു ചിത്രത്തിന്. മമ്മൂട്ടിയുടെ അഭിനയ ജീവിതത്തിലെ അവിസ്മരീണ ചിത്രമെന്നാണ് ചിത്രം കണ്ടവർ അഭിപ്രായപ്പെട്ടത്.

ട്രാന്‍സ് ജെന്‍ഡര്‍ അഞ്ജലി അമീര്‍, സമുദ്രക്കനി തുടങ്ങിയവരും മുഖ്യ വേഷങ്ങളില്‍ അഭിനയിക്കുന്നു. മലയാളത്തില്‍നിന്ന് സിദ്ദീഖും സുരാജ് വെഞ്ഞാറമൂടും ചിത്രത്തിലുണ്ട്. യുവന്‍ ശങ്കര്‍ രാജയാണ് പാട്ടുകള്‍ ഒരുക്കിയത്. തേനി ഈശ്വര്‍ ആണ് ഛായാഗ്രാഹകന്‍. ശ്രീകര്‍ പ്രസാദാണ് ചിത്രം എഡിറ്റ് ചെയ്തത്. ഒരു ട്രാൻസ് വുമൺ നായിക ആകുന്ന ചിത്രമെന്ന നിലയിലും പേരൻപ് ശ്രദ്ധ നേടിയിരുന്നു.

147 മിനിറ്റ് ദൈര്‍ഘ്യമുള്ള ചിത്രത്തിൻ്റെ സെന്‍സര്‍ കോപ്പി യു/എ സര്‍ട്ടിഫിക്കറ്റ് നേടിയിട്ടുണ്ട്. പേരൻപ് ഇതിനോടകം തന്നെ നിരവധി ചലച്ചിത്ര മേളകളില്‍ പ്രദര്‍ശിപ്പിക്കുകയും പ്രേക്ഷക നിരൂപക പ്രശംസയും നേടിയ ചിത്രമാണ്. കാണികളുടെ ഉള്ളിൽ ഒരു വിങ്ങലായി അവശേഷിക്കുന്ന കഥാപാത്രമാണ് അമുദൻ.