മമ്മൂട്ടിയുടെ അഭിനയ സൂക്ഷ്മതയുമായി 'പേരന്‍പി'ൻ്റെ രണ്ടാം ടീസര്‍

മമ്മൂട്ടി മുഖ്യ കഥാപാത്രത്തെ അവതരിപ്പിക്കുന്ന തമിഴ് ചിത്രം 'പേരന്‍പി'ന്‍റെ രണ്ടാം ടീസര്‍ പുറത്തുവിട്ടു. ആദ്യ ടീസറില്‍ മമ്മൂട്ടി മാത്രമായിരുന്നു ഉണ്ടായിരുന്നതെങ്കില്‍ രണ്ടാം ടീസര്‍ ചിത്രത്തിലെ മറ്റൊരു പ്രധാന കഥാപാത്രത്തെ കൂടി പരിചയപ്പെടുന്നു. ഈ ടീസറിൽ മമ്മൂട്ടിയുടെ മകളുടെ കഥാപാത്രത്തെ പരിചയപ്പെടുത്തുകയാണ്. ദേശീയ പുരസ്കാര ജേതാവായ റാം ആണ് ചിത്രം സംവിധാനം ചെയ്യുന്നത്.

മമ്മൂട്ടിയുടെ അഭിനയ സൂക്ഷ്മത തന്നെയാണ് ഈ ടീസറിലും പ്രകടമാകുന്നത്. ശബ്ദം കൊണ്ടും ഭാവം കൊണ്ടും മമ്മൂട്ടി അക്ഷരാര്‍ത്ഥത്തിൽ പ്രേക്ഷകരെ ഞെട്ടിച്ചു. വ്യത്യസ്ത ഭാവ തലത്തിലൂടെയാണ് ടീസർ സഞ്ചരിക്കുന്നത്. അമുദന്‍ എന്ന കഥാപാത്രമായാണ് മമ്മൂട്ടിയെത്തുന്നത്. ടാക്സി ഡ്രൈവറും സ്നേഹസമ്പന്നനായ അച്ഛനാണ് അമുദന്‍. അമുദന്‍റെ മകള്‍ പാപ്പ എന്ന 15കാരിയുടെ വേഷം കൈകാര്യം ചെയ്യുന്നത് സാധനയാണ്.



ആദ്യ ‍ടീസറിന് ലഭിച്ച മികച്ച വരവേൽപ്പ് തന്നെയാണ് ഈ ടീസറിനും ലഭിക്കുന്നത്. ട്രാന്‍സ് ജെന്‍ഡര്‍ അഞ്ജലി അമീര്‍, സമുദ്രക്കനി തുടങ്ങിയവരും മുഖ്യ വേഷങ്ങളില്‍ അഭിനയിക്കുന്നു. മലയാളത്തില്‍നിന്ന് സിദ്ദീഖും സുരാജ് വെഞ്ഞാറമൂടും ചിത്രത്തിലുണ്ട്. യുവന്‍ ശങ്കര്‍ രാജയാണ് പാട്ടുകള്‍ ഒരുക്കിയത്. തേനി ഈശ്വര്‍ ആണ് ഛായാഗ്രാഹകന്‍. ശ്രീകര്‍ പ്രസാദാണ് ചിത്രം എഡിറ്റ് ചെയ്തത്.

ലോക ചലച്ചിത്രോല്‍സവങ്ങളില്‍ ഇടം കണ്ടെത്തിയിട്ടുള്ള ചിത്രം ഒട്ടേറെ പ്രശംസകൾ നേടിയിരുന്നു. തുടര്‍ന്നാണ് പേരന്‍പ് ഇന്ത്യയില്‍ റിലീസിനെത്തുന്നത്. ഒരു ട്രാൻസ് വുമണ്ർ നായിക ആകുന്ന ചിത്രമെന്ന നിലയിലും പേരൻപ് ശ്രദ്ധ നേടിയിരുന്നു.