‘തോപ്പില്‍ ജോപ്പന്റെ’ റിലീസ് തടഞ്ഞു

മമ്മൂട്ടി നായകനായ ജോണി ആന്റണി ചിത്രം 'തോപ്പില്‍ ജോപ്പന്റെ' റിലീസിംഗ് കോടതി തടഞ്ഞു. സിനിമയുടെ പകര്‍പ്പവകാശവുമായി ബന്ധപ്പെട്ട് കോതമംഗലം സ്വദേശി ഷിബു തെക്കുപുറം നല്‍കിയ പരാതിയുടെ അടിസ്ഥാനത്തിലാണ് എറണാകുളം ജില്ലാക്കോടതി ചിത്രത്തിന്റെ റിലീസ് തടഞ്ഞത്.

എന്നാല്‍ ഇതുമായി ബന്ധപ്പെട്ട പ്രശ്‌നങ്ങള്‍ ഉടന്‍ പരിഹരിക്കുമെന്നും മുന്‍കൂട്ടി തീരുമാനിച്ചതനുസരിച്ച് ചിത്രം ഒക്ടോബര്‍ 7ന് തന്നെ തീയേറ്ററുകളില്‍ എത്തിക്കുമെന്നും സംവിധായകന്‍ ജോണി ആന്റണി പറഞ്ഞു. സിനിമയുടെ പകര്‍പ്പവകാശം നിര്‍മാതാവ് തനിക്ക് 25 ലക്ഷം രൂപക്ക് വില്‍പന നടത്തിയിരുന്നതാണെന്നും എന്നാല്‍, സിനിമ ഇറങ്ങുന്നതിന് മുമ്പ് നിര്‍മാതാവ് മറ്റൊരു കമ്പനിക്ക് പകര്‍പ്പവകാശം വിറ്റതായി അറിഞ്ഞെന്നും ഈ സാഹചര്യത്തില്‍ റിലീസിങ് തടയണമെന്നുമായിരുന്നു പരാതിക്കാരന്റെ വാദം.

തുറുപ്പുഗുലാന്‍,ഈ പട്ടണത്തില്‍ ഭൂതം, താപ്പാന എന്നീ ചിത്രങ്ങള്‍ക്ക് ശേഷം ജോണി ആന്റണിയും മമ്മൂട്ടിയും കൈകോര്‍ക്കുന്ന ചിത്രമാണ് തോപ്പില്‍ ജോപ്പന്‍. ആന്‍ഡ്രിയയും മംമ്താ മോഹന്‍ദാസുമാണ് നായികമാര്‍.