മഞ്ജിമ മോഹന്‍ വീണ്ടും മലയാളത്തിലേക്ക്; തിരിച്ചുവരവ് 'രാജ്ഞി'യായി

'ഒരു വടക്കുംസെല്‍ഫി' എന്ന ചിത്രത്തിലൂടെ മലയാള സിിമയിൽ നായികയായെത്തിയ മഞ്ജിമ മോഹന്‍ വീണ്ടും മലയാളത്തിലേക്ക് തിരിച്ചെത്തുന്നു. തുടര്‍ന്ന് അന്യഭാഷകളിൽ സജീവമായ മഞ്ജിമ പ്രമുഖ സംവിധായകൻ ഗൗതം മേനോൻ്റെ ചിത്രത്തിലും നായികയായി. സണ്ണി വെയ്ൻ്റെ നായികയായാണ് മഞ്ജിമയുടെ തിരിച്ചു വരവ്.

തെലുഗു സംവിധായകനും തിരക്കഥാകൃത്തുമായ നീലകണ്ഠ റെഡ്ഡി സംവിധാനം ചെയ്യുന്ന ക്വീന്‍ എന്ന സൂപ്പര്‍ഹിറ്റ് ചിത്രത്തിന്‍റെ റീമേക്കിലൂടെയാണ് മഞ്ജിമയുടെ മലയാളത്തിലേക്കുള്ള തിരിച്ചു വരവ് എന്നതാണ് ശ്രദ്ധേയം. കങ്കണ റണാവത്ത്‌ അവിസ്മരണീയമാക്കിയ ഹിന്ദി ചിത്രം ക്വീന്‍ തെന്നിന്ത്യയിലെ വിവിധഭാഷകളിലായി റിലീസിന് തയ്യാറെടുക്കുകയാണ്. ചിത്രത്തിൻ്റെ മലയാളം പതിപ്പിന് സംസം എന്നാണ് പേരിട്ടിരിക്കുന്നത്. ഒക്ടോബറോടെ ചിത്രം റിലീസ് ചെയ്തേക്കും. ഹിന്ദിയില്‍ രാജ്കുമാര്‍ റാവു കൈകാര്യം ചെയ്ത പ്രതിശ്രുത വരൻ്റെ വേഷമാണ് മലയാളത്തില്‍ സണ്ണി വെയ്‌ൻ അവതരിപ്പിക്കുന്നത്.

ചിത്രത്തിൻ്റെ തമിഴ് റീമേയ്ക്ക് ആയ പാരിസ് പാരിസില്‍ കാജല്‍ അഗര്‍വാള്‍ ആണ് നായിക. രമേഷ് അരവിന്ദ് തമിഴും കന്നടയും ഒരുക്കുന്നു. പ്രശാന്ത് വര്‍മ തെലുഗു ചിത്രം ഒരുക്കുമ്പോൾ ചിത്രം നിര്‍മ്മിക്കുന്നത് മനു കുമാരനാണ്. നാല് പതിപ്പുകളും ചിത്രീകരിച്ചത് ഒരേ സമയത്തായിരുന്നു. യൂറോപ്പാണ് ചിത്രത്തിൻ്റെ പ്രധാന ലൊക്കേഷന്‍. കങ്കണയ്ക്ക് മികച്ച നടിയ്ക്കുള്ള ദേശീയ പുരസ്കാരം നേടിക്കൊടുത്ത ചിത്രമാണിത്.

പ്രതിശ്രുതവരന്‍ ഉപേക്ഷിച്ച റാണി മെഹ്റ എന്ന സാധാരണക്കാരി പാരിസിലെത്തുന്നു. തുടര്‍ന്ന് ജീവിതം സമ്മാനിച്ച തെളിച്ചമുള്ള പുതിയ ഉള്‍ക്കാഴ്ചയും ആത്മവിശ്വാസവുമായി തിരികെ എത്തുന്നതുമാണ് ചിത്രത്തിൻ്റെ ഇതിവൃത്തം.