ബിജെപി സ്ഥാനാർത്ഥിയാകുമെന്ന വാർത്ത തെറ്റ്: മഞ്ജു വാര്യർ

കോഴിക്കോട്: വരുന്ന നിയമസഭാ തിരഞ്ഞെടുപ്പിൽ താൻ ബി.ജെ.പി സ്ഥാനാർത്ഥിയാകുമെന്ന വാർത്തകൾ തെറ്റാണെന്ന് നടി മഞ്ജു വാര്യര്‍. തിരുവനന്തപുരം സെന്‍ട്രല്‍ മണ്ഡലത്തില്‍ മഞ്ജുവാര്യര്‍ ബി.ജെ.പി സ്ഥാനാര്‍ത്ഥിയാകുന്നു എന്ന പ്രചരണമാണ് മഞ്ജു നിഷേധിച്ചിരിക്കുന്നത്. ഈ വാര്‍ത്ത തെറ്റാണെന്നും എന്ത് അടിസ്ഥാനത്തിലാണ് ഇത്തരം വാര്‍ത്തകള്‍ പ്രചരിക്കുന്നതെന്ന് അറിയില്ലെന്നും മഞ്ജു പറഞ്ഞു.

സിനിമാ താരങ്ങളെ അണിനിരത്തിയുള്ള പോരാട്ടം പുതുമയല്ല. നടൻമാരായ ജഗദീഷും, സിദ്ധിഖും സ്ഥാനാ‍ർത്ഥികളാകുമെന്നാണ് സൂചന. അതു പോലെ സുരേഷ് ഗോപിയെ ബിജെപി സ്ഥാനാ‍ർത്ഥിയായി പരിഗണിച്ചെങ്കിലും അദ്ദേഹം തെരഞ്ഞെടുപ്പില്‍ മത്സരിക്കുന്നില്ലെന്ന നിലപാട് സ്വീകരിക്കുകയായിരുന്നു.