ഒരുമിച്ചായിരുന്നപ്പോൾ ഒരു പോസിറ്റീവ് എനർജിയുണ്ടായിരുന്നു: മഞ്ജു

നീണ്ട ഇടവേളയ്ക്ക് ശേഷം 'എന്റെ സൂര്യപുത്രിക്ക്' എന്ന ചിത്രത്തിന്റെ നായിക അമലയുടെ തിരിച്ചു വരവ് വാർത്തയായിരുന്നു. ആന്റണി സോണി സംവിധാനം നിർവഹിക്കുന്ന 'കെയ‍ർ ഓഫ് സൈറ ബാനു'വിലൂടെ മലയാളത്തിലെ പ്രിയ നായികയായ മഞ്ജു വാര്യരും അമലയും ഒന്നിക്കുകയാണ്.

ചിത്രത്തിന്റെ ലൊക്കേഷനിൽ വെച്ച് അമലയെ കണ്ട സന്തോഷം മഞ്ജു ഫേസ്ബുക്കിൽ കുറിച്ചിരുന്നു. ഇപ്പോഴിതാ ചിത്രീകരണം തീര്‍ന്ന് അമല തിരിച്ചു പോകുന്നതിന്റെ വിഷമം പങ്കുവെയ്ക്കുകയാണ് താരം. അമല യാത്രപറഞ്ഞുപോകുമ്പോൾ ഹൃദയത്തിൽ ഒരു തരി നൊമ്പരമാണെന്ന് മഞ്ജു പറയുന്നു.

രാവേറുമ്പോഴും അസ്തമിക്കാത്ത ചിരിയായിരുന്നു അമലാമാഡത്തിന്റെ ഏറ്റവും വലിയ സവിശേഷത. അതുകൊണ്ടുതന്നെ ഒരുമിച്ചായിരുന്നപ്പോൾ ഒരു പോസിറ്റീവ് എനർജിയുണ്ടായിരുന്നെന്നും മഞ്ജു കുറിച്ചു.

മഞ്ജുവിന്റെ ഫേസ്ബുക്ക് പോസ്റ്റ്:

കെയർ ഓഫ് സൈറാബാനുവിന്റെ ഷൂട്ടിങ്ങ് പൂർത്തിയാക്കി അമലമാഡം യാത്രപറഞ്ഞുപോകുമ്പോൾ ഹൃദയത്തിൽ ഒരു തരി നൊമ്പരം.

ഈ ദിനങ്ങളിൽ ഞാനൊരു സുഹൃത്തിന്, വഴികാട്ടിക്ക്, സഹോദരിക്ക്,ഗുരുവിന് എല്ലാം ഒപ്പമായിരുന്നു. അവർ പരത്തിയ പ്രകാശത്തിലായിരുന്നു ഓരോ ദിനവും ഷൂട്ടിങ്ങ്. രാവേറുമ്പോഴും അസ്തമിക്കാത്ത ചിരിയായിരുന്നു അമലാമാഡത്തിന്റെ ഏറ്റവും വലിയ സവിശേഷത. ജീവിതത്തെ ഇത്രമേൽ പ്രസാദാത്മകമായി സമീപിക്കുന്നവർ അപൂർവമാണ്. അതുകൊണ്ടുതന്നെ ഒരുമിച്ചായിരുന്നപ്പോൾ ഒരു പോസിറ്റീവ് എനർജിയുണ്ടായിരുന്നു,ഓരോ നിമിഷവും.

അഭിനയപാഠങ്ങളേക്കാളുപരി സ്നേഹത്തിന്റെ,കാരുണ്യത്തിന്റെ വലിയ അധ്യായങ്ങളാണ് നേരിട്ടറിഞ്ഞത്. പ്രത്യേകിച്ച് ഹൈദരാബാദിൽ അവർതന്നെ തുടക്കമിട്ട ദി ബ്ലൂക്രോസ് പോലുള്ള സാമൂഹിക ദൗത്യങ്ങളെക്കുറിച്ചുള്ള വിവരണങ്ങൾ തന്ന പ്രചോദനം ചെറുതല്ല.

മാഡം...നിങ്ങൾ ഇപ്പോൾ ഒരു സഹപ്രവർത്തകയ്ക്കുമപ്പുറം എനിക്ക് പ്രിയപ്പെട്ടതാകുന്നു...