മൂന്നുപേര്‍ ചേര്‍ന്ന് ഒരു ചിത്രം; 'മാറ്റം' റിലീസ് ജൂലായ് ഒന്നിന്

നവാഗതരായ മൂന്ന് പേരുടെ മാത്രം ചിത്രീകരണ പ്രവര്‍ത്തനത്തിലൂടെ പൂര്‍ത്തിയാക്കിയ ഫീച്ചര്‍ ചിത്രം 'മാറ്റം' ജൂലൈ ഒന്നിന് കെ എഫ് ഡി സി തീയേറ്ററുകളിലും ഓണ്‍ലൈനിലും റിലീസ് ചെയ്യുമെന്ന് സംവിധായകന്‍ സജി പാലൂരാന്‍ വാര്‍ത്താ സമ്മേളനത്തില്‍ പറഞ്ഞു. ബാസ് മൂവീസിന്റെ ബാനറില്‍ ഒരു സംവിധായകനും ക്യാമറാമാനും ഒരു ഓള്‍റൗണ്ട് സഹായിയും മാത്രമായിരുന്നു ഫീല്‍ഡ് ക്രൂവായി പ്രവര്‍ത്തിച്ചത്. അഭിനേതാക്കളും, സംവിധായകനും, ക്യാമറാമാനും സിനിമയില്‍ മുന്‍ പരിചയമില്ലാത്തവരായിരുന്നുവെന്നും അദ്ദേഹം പറഞ്ഞു.




സിനിമക്കാവശ്യമായ മൂവിംഗ് ആക്സസറീസ്, ലൈറ്റ്സ് തുടങ്ങിയവയില്‍ പലതും ഡി ഐ വൈ രീതിയില്‍ തയ്യാറാക്കി പരീക്ഷണാത്മകമായാണ് ചിത്രീകരണം നടന്നത്. വിക്ടര്‍ മാധവ്, അരുണിമ മുരളീധരന്‍ എന്നിവര്‍ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. ആതിര സത്യന്‍, പ്രേംജിത്ത്, കല്ലട കമല്‍ജി, ഞെക്കാട് രാജ്, ആര്‍ കെ സജി, അനി ഇടുക്കി തുടങ്ങിയവര്‍ ചിത്രത്തില്‍ വേഷമിടുന്നുണ്ട്. സെജി പാലൂരാന്‍ കഥ, തിരക്കഥ, സംവിധാനം, നിര്‍മ്മാണം എന്നിവ നിര്‍വഹിച്ചിരിക്കുന്ന ചിത്രത്തില്‍ നിതിന്‍ കെ രാജാണ് ഛായാഗ്രഹണം. എഡിറ്റിംഗ് വിപിന്‍ പോള്‍ സാമവേല്‍. ഇടുക്കി ജില്ലയിലെ നെടുങ്കണ്ടത്തും പരിസര പ്രദേശങ്ങളിലുമായിരുന്നു ചിത്രീകരണം നടന്നത്.