#Me Too: സ്ത്രീകൾക്കായി സംഘടന രൂപീകരിക്കുമെന്ന് വിശാൽ

ചെന്നൈ: സ്ത്രീകൾ മുന്നോട്ട് വന്ന് നേരിടുന്ന ലൈംഗികാതിക്രമം തുറന്ന് പറയുന്ന സാഹചര്യത്തിൽ വനിതാ കൂട്ടായ്‌മ രുപീകരിക്കുമെന്ന് തമിഴ് നടൻ വിശാൽ. തമിഴ് സിനിമാ അഭിനേതാക്കളുടെ സംഘടനയായ നടികർ സംഘം ജനറൽ സെക്രട്ടറിയാണ് വിശാൽ. മീ ടൂ ക്യാമ്പെയിനിലൂടെയാണ് സിനിമാ രംഗത്തും രാഷ്ട്രീയ രംഗത്തും കോളിളക്കം സൃഷ്ടിച്ചു കൊണ്ട് ലൈംഗിക ചൂഷണങ്ങൾ വെളിപ്പെടുത്തി കൊണ്ടിരിക്കുന്നത്.

ഗായിക ചിന്മയിക്കും ബോളിവുഡ് നടി തനുശ്രീ ദത്തക്കും പിന്തുണ നൽകുന്നതായും വിശാൽ ട്വിറ്ററിൽ കുറിച്ചു. സിനിമാ രംഗത്തെ വിവിധ സംഘടനകളുടെ പിന്തുണ വനിതാ സംഘടനക്കായി ഉറപ്പാക്കും. മൂന്നംഗ കമ്മിറ്റിയാണ് രുപീകരിക്കുക.ജൂനിയർ ആർട്ടിസ്റ്റുകളെയും സംഘടനയിൽ ഉൾപ്പെടുത്തുമെന്ന് വിശാൽ വ്യക്തമാക്കി. തങ്ങൾ രൂപീകരിക്കുന്ന കമ്മിറ്റിയിൽ സ്ത്രീകൾക്ക് അവർ നേരിടുന്ന ചൂഷണങ്ങളെ കുറിച്ച് പരാതി നൽകാം. സുരക്ഷിതമായ തൊഴിലിടങ്ങൾ ഉറപ്പാക്കുകയാണ് തങ്ങളുടെ ലക്ഷ്യമെന്നും വിശാൽ വ്യക്തമാക്കി.

സ്ത്രീകൾ ചൂഷണങ്ങൾ വ്യക്തമാക്കാൻ തയ്യാറാകണമെന്നും വിശാൽ ട്വീറ്റ് ചെയ്തു. ഇന്നലെ മലയാള സിനിമയിലെ വനിതാ കൂട്ടായ്‌മയായ വിമൻ ഇൻ സിനിമാ കളക്ടീവ് നടത്തിയ വാർത്താ സമ്മേളനത്തിൽ അർച്ചന പദ്‌മിനി എന്ന നടി പ്രൊഡക്ഷൻ അസിസ്റ്റന്റ് ഷെറിൻ സ്റ്റാൻലിക്കെതിരെ രംഗത്ത് വന്നിരുന്നു. മലയാള സിനിമ അഭിനേതാക്കളുടെ സംഘടനയായ എഎംഎംഎ വിഷയത്തിൽ കൃത്യമായി പ്രതികരിക്കുകയോ നടപടിയെടുക്കുമെന്നോ വ്യക്തമാക്കിയിട്ടില്ല. ഈ സാഹചര്യത്തിലാണ് തമിഴ് നടികർ സംഘം ജനറൽ സെക്രട്ടറിയായ വിശാലിന്റെ പ്രസ്താവന പ്രസക്തമാകുന്നത്.