പിറന്നാൾ ദിനത്തിൽ മോഹൻലാലിന്‍റെ സർപ്രൈസ്; 'നീരാളി' ട്രെയിലർ എത്തി

58ാം പിറന്നാളാഘോഷ വേളയിൽ ആരാധകര്‍ക്ക് വമ്പൻ സര്‍പ്രൈസുമായി മോഹൻലാൽ. തന്‍റെ ഏറ്റവും പുതിയ ചിത്രമായ നീരാളിയുടെ ട്രെയിലറാണ് ലാലേട്ടൻ ആരാധകര്‍ക്ക് പിറന്നാളിന് സര്‍പ്രൈസായി നൽകിയത്. തന്‍റെ ഫേസ്‍‍ബുക്ക്, ട്വിറ്റര്‍ അക്കൗണ്ടുകളിലൂടെയാണ് നീരാളിയുടെ ട്രെയിലർ ആരാധകരുമായി പങ്കുവെച്ചത്.

ബോളിവുഡ് സംവിധായകൻ അജോയ് വർമ്മ ആദ്യമായി മലയാളത്തിൽ സംവിധാനം ചെയ്യുന്ന ചിത്രത്തിൽ സണ്ണി ജോർജ്ജ് എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്. നാദിയ മൊയ്‌തുവാണ് ചിത്രത്തിലെ നായിക.


'നോക്കെത്താ ദൂരത്ത് കണ്ണും നട്ട്' എന്ന ചിത്രത്തിന് ശേഷം മോഹൻലാൽ-നാദിയ സൂപ്പര്‍ഹിറ്റ് കൂട്ടുകെട്ട് ഒന്നിക്കുന്ന ചിത്രമെന്ന പ്രത്യേകതയുമായാണ് ചിത്രമെത്തുന്നത്. മോഹൻലാലിന്‍റെ ഭാര്യയായാണ് നാദിയ ചിത്രത്തിൽ പ്രത്യക്ഷപ്പെടുന്നത്. നവാഗതനായ സാജു തോമസാണ് നീരാളിയുടെ തിരക്കഥ തയ്യാറാക്കിയത്. മുഴുനീള ആക്ഷൻ-ത്രില്ലർ ചിത്രമായാണ് നീരാളി ഒരുക്കിയിരിക്കുന്നത്. മുംബൈ, പുണെ, സത്താറ, മംഗോളിയ, തായ്‌ലന്‍ഡ് എന്നിവിടങ്ങളിലായിരുന്നു ചിത്രീകരണം.ചിത്രം ജൂൺ 14നാണ് ചിത്രം റിലീസ് ചെയ്യുന്നത്.