എഎംഎംഎ യോഗം വെള്ളിയാഴ്ച; മോഹൻലാൽ താരങ്ങളെ പ്രത്യേകം കാണും

കൊച്ചി: മലയാള സിനിമാതാരങ്ങളുടെ സംഘടനയായ എഎംഎംഎയുടെ അനൗദ്യോഗിക നിര്‍വാഹകസമിതി യോഗം വെള്ളിയാഴ്ച ചേരുമെന്ന് റിപ്പോര്‍ട്ട്. മോഹൻലാലിന്‍റെ അധ്യക്ഷതയിൽ ചേരുന്ന യോഗത്തിൽ നിര്‍വാഹകസമിതിയിലെ ലഭ്യമായ അംഗങ്ങളായിരിക്കും പങ്കെടുക്കുക. നടിയെ ആക്രമിച്ച കേസിലെ പ്രതിയായ ദിലീപിനെ സംരക്ഷിക്കുന്ന കാര്യത്തിലും വിഷയത്തിൽ വിമൻ ഇൻ സിനിമ കളക്ടീവ് ഉന്നയിച്ച ആരോപണങ്ങളിലും നേതൃത്വം രണ്ട് തട്ടിലായത് വെളിച്ചത്തായതിനു പിന്നാലെയാണ് അനൗദ്യോഗികയോഗം. അംഗങ്ങളെ മോഹൻലാൽ പ്രത്യേകം കാണുമെന്നും ഭിന്നത പരിഹരിക്കാനുള്ള ശ്രമമുണ്ടാകുമെന്നുമാണ് സൂചന.

നിര്‍വാഹകസമിതിയോഗത്തിനു മുന്നേ സമിതി അംഗങ്ങളുമായി മോഹൻലാൽ പ്രത്യേകം ചര്‍ച്ച നടത്തിയേക്കും. ഡബ്ല്യൂസിസി ഉന്നയിച്ച ആരോപണങ്ങളും യോഗം ചര്‍ച്ച ചെയ്യും. എഎംഎംഎയിൽ ലൈംഗികാതിക്രമങ്ങള്‍ റിപ്പോര്‍ട്ട് ചെയ്യാനായി ആഭ്യന്തരസമിതിയെ നിയോഗിക്കണമെന്ന് ആവശ്യപ്പെട്ട് ഡബ്ല്യൂസിസി ഹൈക്കോടതിയിൽ ഹര്‍ജി നല്‍കിയിട്ടുണ്ട്.

ഇരയായ നടിയെ സംരക്ഷിക്കാൻ തയ്യാറാകാത്ത എഎംഎംഎ കുറ്റാരോപിതനായ നടനെ സംരക്ഷിക്കുകയാണെന്ന് കഴിഞ്ഞ ദിവസം ഡബ്ല്യൂസിസി വാര്‍ത്താ സമ്മേളനത്തിൽ ആരോപിച്ചിരുന്നു. എന്നാൽ ഇതിനെതിരെ നടൻ സിദ്ദിഖും നടി കെപിഎസി ലളിതയും പ്രത്യേകം പത്രസമ്മേളനം വിളിച്ചത് വിവാദമായിരുന്നു. സിദ്ദിഖിന്‍റെ വാക്കുകളെ തള്ളി സംഘടനാ വക്താവ് നടൻ ജഗദീഷ് പുറത്തിറക്കിയ പത്രക്കുറിപ്പും ചര്‍ച്ചയായതോടെ വിഷയത്തിൽ അംഗങ്ങള്‍ക്കിടയിൽ ഭിന്നതയുണ്ടെന്ന റിപ്പോര്‍ട്ടുകള്‍ വന്നിരുന്നു.