മാണിക്യന്‍റെ കഥ നാട്ടിൽ തന്നെ; ഒടിയനെ പറ്റി മോഹൻലാൽ പറയുന്നു

മോഹൻലാലിനെ നായകനാക്കി ശ്രീകുമാര്‍ മേനോൻ ഒരുക്കുന്ന ബിഗ് ബഡ്ജറ്റ് ചിത്രമായ ഒടിയന്‍റെ വിശേഷങ്ങൾ പങ്കുവെച്ച് മോഹൻലാൽ രംഗത്ത്. ത്രില്ലര്‍ എന്ന് വിശേഷിപ്പിച്ച് മാജിക്കല്‍ റിയലിസത്തിന്‍റെ തലത്തില്‍ ഒരുക്കുന്ന ഒടിയൻ കാശിയിലായിരുന്നു ആദ്യ ഷെഡ്യൂൾ ഷൂട്ടിങ് പൂര്‍ത്തിയാക്കിയത്. പാലക്കാട്, തസറാക്ക്, ഉദുമല്‍പേട്ട്, പൊള്ളാച്ചി, ഹൈദരാബാദ് എന്നിവിടങ്ങളിലും ചിത്രത്തിന്‍റെ ഷൂട്ടിങ് നടക്കും. പാലക്കാട് തേങ്കുറിശ്ശിയിലാണ് ഇപ്പോൾ ഷൂട്ടിങ് പുരോഗമിക്കുന്നത്. ജീവിതത്തിന്‍റെ പ്രധാനഘട്ടങ്ങള്‍ തേങ്കുറിശ്ശിയിൽ ചെലവഴിക്കുന്ന മാണിക്യന്‍ എന്ന കഥാപാത്രം എന്തിനാണ് കാശിയിലെത്തിയതെന്ന വിശദീകരണവുമായി മോഹന്‍ലാല്‍ രംഗത്തെത്തിയിരിക്കുകയാണിപ്പോൾ. തന്‍റെ ഫേസ്ബുക്കിലൂടെ പങ്കുവെച്ച വീഡിയോയിലൂടെയാണ് താരം ഇക്കാര്യം ആരാധകരെ അറിയിച്ചത്.




ഒടിയന്‍ മാണിക്യന്‍റെ കഥ പറയാന്‍ വേണ്ടിയാണ് കാശിയില്‍ എത്തിയതെന്നും ഒടിയന്‍ മാണിക്യന്‍റെ കഥ നടക്കുന്നത് നാട്ടിലാണെന്നും താരം വ്യക്തമാക്കി. തേന്‍കുറിശ്ശിയിലാണ് പ്രധാന സംഭവങ്ങളെല്ലാം നടക്കുന്നത്. എല്ലാം അവസാനിപ്പിക്കണമെന്ന് കരുതി മാണിക്യന്‍ വന്നുപെടുന്നത് കാശിയിലാണ്. ഈ ഗംഗയുടെ തീരത്തും ഇവിടുത്തെ തിരക്കേറിയ നഗരങ്ങളിലുമായി അദ്ദേഹം അനേകവര്‍ഷങ്ങള്‍ കഴിച്ചുകൂട്ടിയെന്നും പക്ഷേ ഇപ്പോള്‍ മാണിക്യന് തേന്‍കുറിശ്ശിയിലേക്ക് പോയേ പറ്റൂവെന്നും താരം പറയുന്നു.

തേന്‍കുറിശ്ശിയില്‍ ഒരുപാട് കഥാപാത്രങ്ങളും ഒരുപാട് സംഭവവികാസങ്ങളും മാണിക്യനെ കാത്ത് ഇരിപ്പുണ്ട്. അതുകൊണ്ട് മാണിക്യന്‍ തിരിച്ചുപോവുകയാണ്. നിങ്ങളെപ്പോലെ എനിക്കും ഏറ്റവും പ്രതീക്ഷ നല്‍കുന്ന ഒരു കഥാപാത്രമാണ് മാണിക്യനെന്നും മോഹന്‍ലാല്‍ വീഡിയോയിൽ പറഞ്ഞു.




പാലക്കാട് തേങ്കുറിശ്ശിയിലേക്ക് എത്തുന്നതിന് മുന്‍പുള്ള ‘മാണിക്യന്‍റെ’ ജീവിതമാണ് വാരാണസിയില്‍ ചിത്രീകരിക്കുന്നതെന്ന് ശ്രീകുമാര്‍ മേനോന്‍ മുൻപ് പറഞ്ഞിരുന്നു. അതിന് ശേഷമാണ് മാണിക്യൻ ഒടിയൻ മാണിക്യനാകുന്നതെന്നും അദ്ദേഹം വ്യക്തമാക്കിയിരുന്നു. 35 കോടി മുതല്‍ മുടക്കുള്ള സിനിമയില്‍ വിഷ്വല്‍ എഫക്ട്‌സിന് മാത്രമായാണ് ഏഴ് കോടി രൂപ മുടക്കുന്നത്. ഷാജി കുമാറാണ് ക്യാമറ കൈകാര്യം ചെയ്തിരിക്കുന്നത്. പീറ്റര്‍ ഹെയ്ന്‍ ആണ് ചിത്രത്തിന്‍റെ സംഘട്ടനരംഗങ്ങൾ സംവിധാനം ചെയ്യുന്നത്. ഹരികൃഷ്ണനാണ് ചിത്രത്തിന് തിരക്കഥ ഒരുക്കിയിരിക്കുന്നത്.

Mohanlal's Odiyan: He speaks about his Charecter

Actor Mohanlal's upcoming Malayalam Movie Odiyan: He speaks about his Charecter named Odiyan Manikyan