തമിഴ് ഗാനരചയിതാവ് നാ മുത്തുകുമാര്‍ അന്തരിച്ചു

ചെന്നൈ: പ്രശസ്ത തമിഴ് ഗാനരചയിതാവും ദേശീയ പുരസ്‌കാര ജേതാവുമായ നാ മുത്തുകുമാര്‍ അന്തരിച്ചു. 41 വയസ്സായിരുന്നു. രൂക്ഷമായ മഞ്ഞപ്പിത്ത ബാധയെ തുടര്‍ന്ന് കഴിഞ്ഞ ഏതാനും ദിവസങ്ങളായി ചികിത്സയിലാ യിരുന്നു. ഏകദേശം ആയിരത്തോളം തമിഴ് ചിത്രങ്ങള്‍ക്ക് അദ്ദേഹം ഗാനരചന നിര്‍വ്വഹിച്ചിട്ടുണ്ട്.

പ്രമുഖ തമിഴ് സംവിധായകന്‍ ബാലു മഹീന്ദ്രയുടെ ശിഷ്യനായാണ് മുത്തുകുമാര്‍ സിനിമിയിലെത്തുന്നത്. സീമന്‍ സംവിധാനം ചെയ്ത വീരനാടൈ എന്ന ചിത്രത്തില്‍ അരങ്ങേറ്റം കുറിച്ച മുത്തുകുമാര്‍ പല പ്രമുഖ സംവിധായകര്‍ക്കൊപ്പവും പ്രവര്‍ത്തിച്ചിട്ടുണ്ട്. 2013-ല്‍ തങ്കമീന്‍കള്‍ എന്ന ചിത്രത്തിലെ ആനന്ദയാഴൈ എന്ന ഗാനത്തിനും 2014-ല്‍ സൈവം എന്ന ചിത്രത്തിലെ അഴകേ അഴകേ എന്ന ഗാനത്തിനും മുത്തുകുമാറിന് ദേശീയ പുരസ്‌കാരം ലഭിച്ചിട്ടുണ്ട്.

കാതല്‍, വാരണം ആയിരം, നാടോടികള്‍, തുപ്പാക്കി, സിങ്കം, നന്‍പന്‍, മദ്രാസിപ്പട്ടണം, നീതാന്‍ എന്‍ പൊന്‍വസന്തം തുടങ്ങി നിരവധി ചിത്രങ്ങള്‍ക്ക് മുത്തുകുമാര്‍ ഗാനരചന നിര്‍വഹിച്ചിട്ടുണ്ട്. അജിത് നായകനായം കിരീടം എന്ന ചിത്രത്തിനായി സംഭാഷണവും എഴുതിയിട്ടുണ്ട്. സില്‍ക്ക് സിറ്റി എന്നൊരു നോവലും മുത്തുകുമാര്‍ രചിച്ചിട്ടുണ്ട്.